महामारीमा १५० बढीको मृत्यु भएकाे दाबीसहित भारतीय सेनाप्रमुखसँग खाेप माग्दै गाेर्खासैनिककाे पत्र

भारतीय आर्मीमा काम गरेका गोर्खा सैनिकहरुले भारतीय सैन्य प्रमुख एमएम नरवाणेलाई कोरोनाविरुद्धको खोप उपलब्ध गराइदिन पत्र लेखेका छन् । 

नेपालमा कोरोना संक्रमितको संख्या बढेको र त्यसले आफू र आफ्ना परिवारको मृत्यु हुनुका साथै ठूलो आर्थिक क्षति भएको उल्लेख गर्दै उनीहरुले नरवाणेसँग खोपका लागि गुहार गरेका हुन् ।

भारतीय सेनामा काम गरेका तर स्थायी रुपमा नेपालमा बसोबास गर्ने पूर्व गोर्खा सैनिकहरुले लेखेको पत्रमा १५० जनाभन्दा गोर्खासैनिकको कोरोनाका कारण ज्यान गइसकेको उल्लेख गरिएको छ ।

पत्रमा उनीहरुले हालसम्म एक डोजमात्रा खोप पनि लगाउन नपाइएको उल्लेख गरेका छन् । सेवानिवृत्त गोर्खा सैनिकले नेपाल सरकार उनीहरु वा उनीहरुको परिवारलाई प्राथमिकता दिदै खोप दिने स्थितिमा नभएको उल्लेख गरेका छन् ।

आफूहरुले भारतीय सेनाको पूरा निष्ठापूर्वक सेवा गरेको उल्लेख गर्दै अहिले आफूहरु मरिरहेको अवस्थामा खोप उपलब्ध गराइ सहयोग गरिदिन गोर्खा सैनिकले अनुरोध गरेका छन् ।

भारतीय पोलिक्लिकहरुमार्फत खोप उपलब्ध गराउने वातावरण मिलाइदिन पत्रमा आग्रह गरिएको छ । विश्वमा गोर्खा सैनिकका नामले प्रशिद्ध आफूहरुलाई खोपको प्राथमिकताको सुचीमा नराखिनु दुखद भएको उनीहरुको ठम्याई छ । 

गोर्खासैनिकले नरवाणेलाई कम्तीमा ३ लाख डोज खोप आफूहरुलाई आवश्यक पर्ने समेत उल्लेख गरेका छन् । 

यही महिनाको सुरुवातमा भारतीय सैनिकले जम्मु कास्मिरमा डयुटीका बेला शहिद भएका सैनिक, पूर्व सैनिक उनीहरुको परिवारलाई खोप लगाउने अभियान चलाएको थियो ।

गत मार्चमा भारतीय सेनाले नेपाली सेनालाई समेत १ लाख डोज खोप अनुदानमा दिएको थियो । भारतबाटै अनुदानमा १० लाख डोज खोप पाएपनि गत जनवरीमा नेपालमा खोप अभियान सुरु भएको थियो ।