विश्व प्रविधि जगतका सय चेञ्जमेकरको सूचीमा एफवान सफ्टका अध्यक्ष ढकाल

एफवान सफ्ट ग्रुपका अध्यक्ष विश्वास ढकाल ग्लोबल टेक चेञ्जरहरूको ‘रेस्ट अफ वल्र्ड’ को सय जनाको सूचीमा परेका छन् । 

सामूहिक उत्पादन र वितरण, लगानी तथा प्राविधिक प्रयोगकर्तालाई उनीहरूको स्थानीय बजारभन्दा टाढा सुरक्षित गरिने क्षेत्रमा ठूलो प्रभाव पारेको भन्दै ढकाललाई सूचीमा समावेश गरिएको हो । 

पश्चिमा देशबाहेक विश्वभर नवीन खोजकर्ता, नेतृत्वकर्ता, संस्थापक, लगानीकर्ता र नवप्रवर्तन गतिविधि गर्ने व्यक्तिलाई यो सूचीमा समावेश गरिन्छ ।

ढकालले स्थापना गरेको डिजिटल कारोबारसम्बन्धी कम्पनी एफवान सफ्ट सुरु भएको १८ वर्ष पुगिसकेको छ । कम्पनीअन्तर्गत अन्य १३ कम्पनी सञ्चालमा छन् । 

नेपाल कलेज अफ इन्फर्मेसन टेक्नोलोजी (एनसीआईटी)मा सफ्टवेयर इन्जिनियरिङ अध्ययन गरेका ढकालले २००४ मा एफवान सफ्ट कम्पनी दर्ता गरेका थिए । 

त्यसयता नेपालको सबैभन्दा ठूलो फिनटेक कम्पनी बन्न सफल एफवान ‘ग्रुप अफ कम्पनी’ भएको छ । आफ्ना कम्पनीमार्फत यसले बैंकिङ, सफ्टवेयर डेभलपमेन्ट, स्वास्थ्य, बीमा, बस टिकट, मनि ट्रान्सफर, खानेपानी, ट्राभल, आईटी कलजेजस्तो धेरै क्षेत्रमा लगानी र काम गर्दै आएको छ ।

कम्पनीमा हाल एक हजार जनाले प्रत्यक्षरुपमा रोजगारी पाउँदै आएका छन् । एफवानले सन् २००६ देखि बैंकिङ र फाइनान्समा काम सुरु गरेको थियो भने । 

सन् २०१२ मा इसेवा कम्पनी दर्ता गरे डिजिट कारोबारको क्षेत्रमा एफवानले ठूलै क्रान्ति ल्यायो । त्यतिबेलासम्म एफवानले बैंकिङ प्रणालीलाई सहज र डिजिटल बनाउने काम गर्दै आएको थियो भने मोबाइल बैंकिङमा बैंकहरुलाई सफ्टवेयर उपलब्ध गराउँदै आएको थियो । 

ग्रुपअन्तर्गत एफवान सफ्ट, ई–सेवा, फोनपे, कोजेन्ट हेल्थ, दियालो टेक्नोलोजिज, दर्शन टेक, ई–सेवा मनि ट्रान्सफर, बस सेवा, एक्सटेन्सो डेटा, लोजिका बिन्स, सिरान टेक्नोलोजिज, स्वस्तिक कलेज, ई–सेवा ट्राभल कम्पनी छन् ।