उखु किसान भन्छन्- दसैँमा कसरी गर्जो टारौँ भन्ने थियो,अनुदान रकम आएपछि खुसी छौं

अनुदान रकम पाएपछि महोत्तरीका उखु किसान खुसी भएका छन्। सरकारबाट अनुदान पाउने कुनै आशाभरोसा नभएको स्थितिमा रकम पाएपछि उनीहरू खुसी भएका हुन्। आर्थिक वर्ष २०८०/८१ मा गौशाला–१ स्थित एभरेष्ट सुगर एण्ड केमिकल इण्डष्ट्रिजलाई उखु बेचेका किसानले अनुदानबापतको रकम पाएका हुन्।

उक्त उद्योगलाई गत वर्ष उखु बेचेका १४ हजार ४४४ किसानका खातामा उनीहरुले बुझाएका उखुको परिमाणअनुसार प्रतिक्विण्टल रु ७० का दरले अनुदान रकम दाखिला भएको कोष तथा लेखा नियन्त्रण कार्यालय छ। किसानलाई २० करोड ३३ लाख १५ हजार ८११ अनुदान दिइएको छ।

कार्यालयप्रमुख बालकृष्ण अधिकारीका अनुसार अनुदान रकम बैंक खाता भएका सबै किसानले पाएका र नहुनेले पनि धमाधम खोता खोल्न थालेका छन्। ‘रकम दाखिलाको क्रम जारी छ। दसैँमा कसरी गर्जो टारौँ भन्ने थियो,अनुदान रकम आएपछि खुसी छु’, भङ्गाहा–४ का उखु किसान अरुण गिरी भन्छन्,‘हामीलाई दसैँ उपहार पाएजस्तै भएको छ।’

एभरेष्ट चिनी उद्योगले भने २९ लाख चार हजार ५११ क्विन्टल उखु क्रसिङ् गरेर दुई लाख ६४ हजार ५११ क्विन्टल चिनी उत्पादन गरेको थियो। गत वर्ष उखुको मूल्य उद्योगले ५४० र सरकारले अनुदान बापत ७० गरी प्रति क्विन्टल ६१० कायम गरेको थियो। किसानले प्रतिक्विन्टल ७५० हुनपर्ने माग गरेका थिए।

सरकारले पछिल्ला तीन वर्षयता उखुको अनुदान रकममा प्रति क्विण्टल पाँच बढाएर ७० पुर्‍याएको हो। उखुको समयमा नै भुक्तानी तथा सरकारबाट अनुदान पनि पाएका यहाँका किसान उखुखेति विस्तार गर्ने योजनामा रहेका उखु उत्पादक कृषक संघका अध्यक्ष नरेशसिंह कुशवाहाले बताए।

हाल यहाँ दश हजार बिघामा उखुखेती भएको छ। उनले उखु उत्पादक किसानको सहभागितामा प्रत्येक वर्ष ‘क्रसिङ् सिजन’अगावै को मूल्य निर्धारण हुनुपर्नेमा जोड दिए।