चनिकलाल भन्छन्– बाढीमा बग्दै आएको मान्छे हेरेर बस्न सकिनँं

गत असोज १२ गते नख्खु खोलाको उर्लदो बाढीमा हामफालेर दुई जनाको ज्यान बचाएका चनिकलाल तामाङ साहसी युवा भनेर हाल निकै चर्चामा छन् । चर्चा मात्र होइन हाल उनलाई दैनिकजसो सम्मान गर्ने गरिएको छ ।
यसै क्रममा आज ललितपुर महानगरपालिकाले पनि तामाङलाई सम्मान गर्‍यो ।

सम्मान कार्यक्रममा उनले श्रीमती र छोरीले नजाऊ भन्दाभन्दै खोलामा हामफालेर दुई जनालाई बचाउने काम गरेको बताए । खोलामा बग्दै आएको मान्छे देखेपछि आफूले हेरेर बस्न नसकेको उनले सुनाए । ‘ठूलो खोला थियो, काठ तथा अन्य सामान पनि बगाएर ल्याएको थियो, मान्छेलाई खोलाले बगाउँदै नजिकै ल्यायो, मन थाम्न सकिन, श्रीमती र छोरीले नजाऊ बगाउँछ भन्दै थिए तर उनीहरू र आफ्नो प्रवाह नगरी हामफालेर बचाएँ’, चनिकलाले भने ।

उनले मानवताको भावनाले ज्यान बचाएको र पछिल्लो समय आफ्नो कामको यति धेरै चर्चा सुनेपछि मात्रै त्यसको महत्व थाहा पाएको धारणा राखे । तामाङले आफूले कल्पनामा पनि यस्तो सम्मान पाइएला भन्ने नसोचेको भन्दै महानगरप्रति आभार व्यक्त गरे । ‘मलाई कुनै सम्मानको आश थिएन तर पनि नगद रु एक लाखसहित तपाईहरूले गर्नु भएको यो सम्मानप्रति म निकै खुसी छु’, उनले भने । ललितपुर महानगरले चनिकलाललाई नगद एक लाख र सम्मानपत्र प्रदान गरेको थियो ।

ललितपुर महानगर प्रमुख चिरीबाबु महर्जनले चनिकलालले गरेको यो महत्वपूर्ण मानवीय कार्यको जति प्रशंसा गरेर पनि अपूरो हुने भन्दै ठूलो जोखिम मोलेर दुई जनाको ज्यान बचाएकामा धन्यवाद दिए । ‘बहादुरीपूर्वक जुन काम गर्नुभयो, त्यो ज्यादै प्रशंसायोग्य छ, तपाईको बहादुरीले दुई जनाको ज्यान बच्यो, यो सम्मानभन्दा पनि ठूला हो । तपाईले गर्नुभएको काम भविष्यमा पनि सम्झिरहने छौँ’, उनले भने । सम्मान कार्यक्रममा ललितपुर महानगरका प्रवक्ता राजु महर्जन, प्रमुख प्रशासकीय अधिकृत रेखादास श्रेष्ठ, सामान्य प्रशासन महाशाखा प्रमुख देवप्रसाद गुरागाईलगायतको उपस्थिति थियो ।