प्रहरीमा ३० वर्षे सेवा अवधि हटाउन गृहकार्य तीव्र
सेवा अवधिका कारण भदौ १५ देखि एकसाथ करिब सय जना सिनियर प्रहरी अवकाशमा जाँदै
२८ साउन २०८१ १९:१७
लामो समयदेखि चर्चामा रहेको नेपाल प्रहरीमा ३० वर्षे सेवा अवधि हटाउने प्रयाेजनार्थ गृहकार्य तीव्र पारिएको छ । सेवा अवधि हटाउने प्रावधानसहित गृह मन्त्रालयले संघीय प्रहरी ऐन निर्माण प्रक्रिया अघि बढाएको हाे ।
एक महिनाभित्र ऐनका लागि तयार विधेयक संसदमा पेस गर्ने गरी गृहकार्य भइरहेकाे छ मन्त्रालयले जनाएकाे छ ।
गृहमन्त्री रमेश लेखकले जिम्मेवारी सम्हालेलगत्तै मातहत कार्यालयको ‘ब्रिफिङ’ लिँदा महिना दिनभित्र विधेयक संसदमा पेस गरिने बताएका थिए । त्यसपछि विधेयकका सम्बन्धमा प्रहरी प्रधान कार्यालय र गृह मन्त्रालयमा पटकपटक दफवार छलफल भएका छन् ।
मन्त्रालयका एक अधिकारीका अनुसार संघीय प्रहरी ऐन निर्माण प्रक्रिया द्रुत गतिमा अघि बढेको छ ।
प्रहरीमा ३० वर्षे सेवा अवधि हटाउन अर्थ मन्त्रालयले २०७९ मंसिरमै सैद्धान्तिक सहमति दिएको थियो । तर, कानुन मन्त्रालयको सहमति भने लिन बाँकी छ । गृह मन्त्रालयका अनुसार कानुन मन्त्रालयबाट स्वीकृत भएलगत्तै विधेयक मन्त्रिपरिषदमा पेस हुनेछ । मन्त्रिपरिषद बैठकले पारित गरेपछि विधेयक संसदमा पेस हुनेछ ।
संघीय प्रहरी ऐन बन्न नसक्दा संघ र प्रदेशबीच प्रहरी समायोजन हुन सकेको छैन । सरकारले प्रहरी कर्मचारीलाई नेपाल प्रहरी तथा प्रदेश प्रहरीमा समायोजन गर्न चार वर्षअघि नै ‘प्रहरी कर्मचारी समायोजन ऐन, २०७६’ निर्माण गरिसकेको छ ।
त्यस्तै नेपाल प्रहरी र प्रदेश प्रहरीले सम्पादन गर्ने कार्यको सञ्चालन, सुपरीवेक्षण र समन्वय गर्ने सम्बन्ध (नेपाल प्रहरी र प्रदेश प्रहरी (कार्य सञ्चालन, सुपरिवेक्षण र समन्वय) ऐन, २०७६) मा पनि चार वर्षअघि नै ऐन बनेको छ । सोही ऐनअनुसार प्रहरी समायोजन गर्न भन्दै सातै प्रदेशका मुख्यमन्त्रीले सरकारसँग पटकपटक आग्रह गरेका छन् ।
यस्तै ३० वर्षे सेवा अवधिका कारण आगामी भदौ १५ देखि एकसाथ करिब एक सय जना सिनियर प्रहरी अधिकृत अवकाशमा जाँदै छन् ।
३० वर्षे सेवाहदका कारण ५४-५५ वर्षमै धेरै उच्च प्रहरी अधिकारीले अवकाश पाउँदा राज्यले दक्ष जनशक्ति गुमाउने गरेको छ । अर्काेतर्फ भर्ना प्रक्रियामा राज्यको खर्च हुन्छ भने पेन्सनको भार पनि बढ्ने गरेको छ ।
वर्षे सेवाहदका कारण डीआईजी विष्णु केसीसहित करिब सय जनाले आगामी १५ भदौदेखि अवकाश पाउँदै छन् । यसमा १२ एसएसपी छन् । एसएसपीहरू जीवनकुमार श्रेष्ठ, रेवती ढकाल, किसनसिंह थापा, डिल्लीराज विष्ट, बेलबहादुर पाण्डे, दिनेशराज मैनाली, नवीनराज राई, रविकुमार पौडेल, वीरबहादुर ओली, चन्द्रदेव राई, रवीन्द्र रेग्मीले एकैदिन अवकाश पाउनेछन् ।
त्यस्तै ११ एसपीले पनि अवकाश पाउने छन् । कृष्ण प्रसाईं, प्रेमबहादुर बस्नेत, राजेन्द्रबाबु रेग्मी, लक्ष्मीराज अधिकारी, देवेन्द्रबहादुर पाल, विष्णुहरि कोइराला, अवदेश विष्ट क्षेत्री, नरेन्द्रकुमार कार्की, टेकनन्द इवा लिम्बू, चित्रबहादुर गुरूङ, नवीनकिशोर प्रधानले अवकाश पाउन लागेका हुन् ।
प्रतिक्रिया