यस्तो छ एयर डाइनेस्टीको हेलिकप्टर दुर्घटनास्थल (फोटो फिचर)

त्रिभुवन अन्तर्राष्ट्रिय विमानस्थलमा साउन ९ गते १८ जनाको मृत्यु हुने गरी भएको सौर्य एयरलाइन्सको जहाज दुर्घटना सेलाउन नपाउँदै नेपालमा अर्को हवाई दुर्घटना भएको छ । नुवाकोटमा बुधबार दिउँसो एयर डाइनेष्टीको हेलिकोप्टर दुर्घटना भएको हो । दुर्घटनामा क्याप्टेनसहित हेलिकोप्टरमा सवार सबै पाँच जनाको मृत्यु भएको छ । क्याप्टेन अरूण मल्ल र हेलिकोप्टरमा सवार चार जना चिनियाँ नागरिकको मृत्यु भएको प्रहरीले जनाएको छ ।

काठमाडौंबाट दिउँसो १ बजेर ५४ मिनेटमा रसुवाको स्याफ्रुबेँसी उडेको एयर डाइनेष्टीको ९एन–एजेडी कलसाइनको हेलिकोप्टर नुवाकोटको शिवपुरी गाउँपालिका–७, सूर्यचौरमा दुर्घटना भएको हो ।

नेपाल नागरिक उड्डयन प्राधिकरणको खोज तथा उद्धार समन्वय केन्द्रका अनुसार उक्त हेलिकोप्टर काठमाडौंबाट उडेको ३ मिनेटमै सम्पर्कविहीन भएको थियो । दुर्घटनामा मृत्यु हुनेमा क्याप्टेन अरूण मल्लसहित चिनियाँ नागरिक जुतड ताङ, जेइली, सीयाद वी र जीक्वीङ सी रहेका छन् । मृत्यु भएका चिनियाँ नागरिकमध्ये सीयाद वी महिला हुन् ।

दुर्घटनास्थलबाट नेपाली सेना, नेपाल प्रहरी र सशस्त्र प्रहरी बलको टोलीले मृतकहरूकाृ शव निकालेका छन् ।