नेपालमा वैदेशिक लगानी बढाएर सहयोग गर्न स्वीस राजदूतलाई प्रधानमन्त्रीको आग्रह
१७ साउन २०८१ ६:५०
प्रधानमन्त्री केपी ओलीले नेपालको आर्थिक विकास र समृद्धिका लागि बढीभन्दा बढी प्रत्यक्ष वैदेशिक लगानीकर्ता भित्र्याएर सहयोग गर्न स्विट्जरल्यान्ड सरकारलाई आग्रह गरेका छन्।
शिष्टाचार भेटका लागि बुधबार प्रधानमन्त्रीनिवास बालुवाटार पुगेकी नेपालका लागि स्विट्जरल्यान्डकी राजदूत डानियल मेउल्ली मोन्टेलोनेसँग प्रधानमन्त्री ओलीले नेपालको विकासका लागि वैदेशिक सहयोग उत्प्रेरक हुने बताए।
उनले समावेशी लोकतान्त्रिक संरचनाको विकासका लागि स्विट्जरल्यान्डको अभ्यास स्थापित भएको उल्लेख गर्दै नेपाल सरकारले लोकतन्त्रको सबलीकरण गर्दै राज्यका संरचनालाई भुइँ तहका जनताप्रति उत्तरदायी बनाउने प्रयत्न गरिरहेको बताए।
प्रधानमन्त्री ओलीले प्रत्यक्ष वैदेशिक लगानी बढाउन सरकारले आवश्यक सुधारात्मक कार्य गर्ने प्रतिबद्धता व्यक्त गर्दै हालै सम्पन्न नेपाल लगानी सम्मेलनमा ५० मुलुकबाट उत्साहजनक सहभागिता भएको उल्लेख गरे। नेपाल सन् २०२६ सम्ममा अल्पविकसित मुलुकबाट स्तरोन्नति हुने र सन् २०३० सम्ममा मध्यम आय भएको मुलुक बन्ने लक्ष्य लिएकाले विकास साझेदारबाट सहयोग अभिवृद्धिको अपेक्षा व्यक्त गरे।
प्रधानमन्त्री ओलीले नेपालको विकासमा निरन्तर सहयोग, कोभिड– १९ को रोकथाममा सहयोग तथा शान्ति प्रक्रियामा सहयोग र सदभावका लागि स्विट्जरल्यान्ड सरकारलाई धन्यवाद दिए। प्रधानमन्त्री ओलीले गत जुलाईमा राष्ट्रपति रामचन्द्र पौडेलको स्विट्जरल्यान्ड भ्रमण र सन् २०१९ मा आफू प्रधानमन्त्री हुँदा डाभोसमा सम्पन्न विश्व आर्थिक मञ्चमा सहभागिताको स्मरण गर्दै यस्ता उच्चस्तरीय भ्रमण र बैठक आदान–प्रदानबाट आपसी सम्बन्धमा नयाँ आयाम थपिने बताए।
राजदूत डानियलले प्रधानमन्त्री ओलीलाई कार्यकाल सफलताका लागि बधाई र शुभकामना दिँदै दुईपक्षीय पारस्परिक हित तथा सहयोग र सहकार्यलाई निरन्तरता दिने विश्वास दिलाएकी थिइन्।
भेटका अवसरमा प्रधानमन्त्री ओलीका प्रमुख स्वकीय सचिव राजेश बज्राचार्य, परराष्ट्र मन्त्रालयका अधिकारी सहभागी थिए।
प्रतिक्रिया