बल्खु खोलामा एक जनाको शव फेला
१६ साउन २०८१ ९:४७
काठमाडौंको बल्खुमा बाढीले बगाएर ल्याएको एक पुरुषको शव फेला परेको छ ।
बाढीले बगाएर ल्याएको अवस्थामा बल्खु खोलामा प्रहरीले एक जनाको शव फेला पारेको हो । ती पुरुषको बाढीमा डुबेर मृत्यु भएको हुनसक्ने प्रहरीले जनाएको छ । शवको सनाखत हुन सकेको छैन ।
गएरातिको अविरल वर्षाले काठमाडौं उपत्यकाका तीन जिल्लाका विभिन्न नदी तथा खोलाहरूमा बाढी उर्लिएको छ ।
बागमती, हनुमन्ते, गोदावरी, मनोहरा खोलामा आएको बाढीले नदी आसपासका सडक अवरुद्ध भएको छ भने किनारका बस्तीमा पानी पसेको छ ।
भक्तपुरको हनुमन्ते खोलामा आएको बाढीले जगाती, सल्लाघारी बाराहीस्थानका सयौं घर डुवानमा परेका छन् ।
त्यस्तै बागमती नदीको जलसतह ललितपुरको खोकनामा खतराको तह पार गरेको छ । पछिल्लो १२ घण्टामा काठमाडौं उपत्यकाका विभिन्न स्थानमा भारी वर्षा भएको छ ।
प्रतिक्रिया