शेयर बजारमा छलाङ : नेप्से ११३ अंकले बढ्यो

आज नेपाल स्टक एक्सचेन्ज (नेप्से) ले २७०० को बिन्दु पार गरेको छ । नेप्सेले आज कारोबार सुरू भएको १ मिनेटमा पहिलो सकारात्मक सर्किट लागेर २० मिनेटका लागि बजार बन्द भएको थियो भने दोस्रो पटक कारोबारमा आएको पुनः १ मिनेटमा दोस्रो सर्किट लागेर बन्द भएको थियो ।

आज शेयर बजारमा उछाल आउँदा वाणिज्य बैंकिङ समूहमा पनि उछाल आएको छ । स्टान्डर्ड चार्टर्स बैंकबाहेक १९ वटा बैंकमा सकारात्मक सर्किट लागेको छ । समग्रमा पूरा बैंकिङ समूह ९.८९ प्रतिशतले बढेको छ । लामो समयदेखि वाणिज्य बैंकको शेयरले राम्रो प्रफमेन्स गर्न नसकी रहेको अवस्थामा आज वाणिज्य बैंक समूह १४१.७६ अंकले बढेर १५७४.३४ बिन्दुमा पुगेको छ ।

नेपाल राष्ट्र बेंकले शुक्रबार सार्वजनिक भएको मौद्रिक नीतिले बैंकलाई लक्षित राम्रो नीतिहरू लिएको थियो । त्यसले गर्दा पनि आज बैंकिङ समूहमा उछाल आएको हो । मौद्रिक नीतिमा संस्थागत लगानीकर्ताका लागि लगाइएको २० करोडको क्याप हटेको छ ।

विशेष गरेर संस्थागत लगानीकर्ताले वित्तीय अवस्था राम्रो भएको कम्पनीमा लगानी गर्ने गरेका छन् । त्यसमा बैंक पर्ने गरेका कारण आज सबै बैंकमा उछाल आएको हो ।

२७०० बिन्दुमा पुगेको नेप्से बजार बन्द हुँदा ४.४१ प्रतिशतले बढेर २६८१.५६ विन्दुमा पुगेको छ । आज नेप्से ११३.४२ अंकले बढ्दा १५ अर्ब ८१ करोड ५ लाख ९६ हजार रूपैयाँ बराबरको कारोबार भएको छ । आज ३१८ वटा कम्पनीको ४ करोड ३ लाख १४ हजार ५१७ कित्ता शेयर १ लाख ६३ हजार ८१० पटक किनबेच भएको छ । आज १४८ वटा कम्पनीको शेयर मूल्य बढेको छ भने ८७ वटा कम्पनीको शेयर मूल्य घटेको छ । ८ वटा कम्पनीको शेयर मूल्य भने स्थिर रहेको छ ।

आज १३ वटा समूहमध्ये सबै समूहको शेयर मूल्य बढ्दा लघुवित्त समूह भने घटेको छ । लघुवित्त समूह १०.०६ अंकले घटेर ५५६१.०७ बिन्दुमा पुगेको छ । आज सबैभन्दा बढी बढ्ने समूहमा बैंकिङ र विकास बैंक नै रहेका छन् । विकास बैंक समूह पनि आज ४.८७ प्रतिशतले बढेर ५२९१.७१ विन्दुमा पुगेको छ ।

आज २१ वटा कम्पनीको शेयर मूल्यमा सकारात्मक सर्किट लागेको छ । एउटा कम्पनीको शेयर मूल्य ९.३५ प्रतिशतले घटेको छ । आज सबैभन्दा बढी कुमारी बैंकको कारोबार भएको छ ।