राष्ट्रियसभाबाट तीन विधेयक सर्वसम्मत पारित
३१ असार २०८१ १८:३४
राष्ट्रियसभाको बैठकले तीन विधेयक सर्वसम्मत पारित गरेको छ । सोमबार बसेको राष्ट्रियसभाको बैठकमा सरकारका तर्फबाट उपप्रधानमन्त्री एवं अर्थमन्त्री विष्णुप्रसाद पौडेलले तीन विधेयक पारितका लागि पेस गरेका प्रस्ताव सर्वसम्मत पारित भएका हुन् ।
बैठकले प्रतिनिधिसभाबाट सन्देशसहित प्राप्त आर्थिक विधेयक, २०८१ लाई सुझावसहित पारित गरी प्रतिनिधि सभामा फिर्ता पठाएको छ ।
यस्तै बैठकले राष्ट्र ऋण उठाउने विधेयक, २०८१ सर्वसम्मतिले पारित गरेको छ ।
प्रतिनिधिसभाबाट सन्देशसहित प्राप्त राष्ट्र ऋण उठाउने विधेयक, २०८१ लाई मुल रूपमै सुझावबिना पारित गरी प्रतिनिधिसभामा फिर्ता पठाइयोस् भन्ने प्रस्ताव सर्वसम्मतिले पारित भएको हो ।
त्यसैगरी बैठकबाट भन्सार महशुल विधेयक, २०८१ पनि सर्वसम्मतिले पारित भएको छ ।
प्रतिनिधिसभाबाट सन्देशसहित प्राप्त भन्सार महशुल विधेयक, २०८१ लाई मुल रूपमै सुझावबिना पारित गरी प्रतिनिधि सभामा पठाइयोस् भन्ने प्रस्ताव सर्वसम्मतिले पारित भएको हो ।
तीन प्रस्तावहरूमाथि छलफल भई अर्थमन्त्री पौडेलले जवाफ दिएसँगै राष्ट्रियसभा अध्यक्ष नारायणप्रसाद दाहालले प्रस्तावहरू सर्वसम्मतिले पारित भएको घोषणा गरेका हुन् ।
प्रतिक्रिया