सिमलताल बस दुर्घटना : खोजीकार्य प्रभावकारी बनाउन माग

चितवनमा भएको बस दुर्घटनामा बेपत्ता भएकाहरूका परिवारजनले खोजीकार्य प्रभावकारी बनाउन माग गरेका छन् । उनीहरूले बेपत्ताको खोजी गर्न आवश्यक प्रविधि र संयन्त्रको प्रयोग गर्दै सबै शक्ति परिचालन गर्न अनुरोध गरेका छन् ।

चितवनको भरतपुर महानगरपालिका–२९ सिमलतालस्थित नारायणगढ–मुग्लिन सडकमा शुक्रबार आएको लेदोसहितको पहिरोका कारण यात्रुसहित त्रिशूली नदीमा दुई बस खसेका थिए । हजुरबुबा दुर्घटनामा परेपछि शुक्रबार चितवन आएका रौतहटको गौरका विकेशकुमार पटेलले दुर्घटनापछि परिवार र गाउँनै शोकमा डुबेको बताए । बिहानै दुर्घटनाको खबर पायौँ, खोजी गर्न भोकभोकै नदी किनारमा बसेका छौँ, उनले भने ।

आफ्ना भिनाजु दुर्घटनामा परेपछि रौतहटका रमेशकुमार पटेल पनि शुक्रबारनै चितवन आएका छन् । आफन्तसहित एम्बुलेन्स रिजर्भ गरेर आएको उनले बताए । शुक्रबार रातिसम्म कोही पनि फेला नपर्दा जीवितै भेट्टाउने आश मारिसकेको उनको भनाइ छ । पटेलले भने, शव फेला परे लैजान्थ्यौँ । अरु त केही आश छैन ।

बाराको परसौनी गाउँपालिकाका अध्यक्ष विनोदप्रसाद जैसवालले बेपत्ताको खोजी गर्न ढिलाइ भएको गुनासो गरे । आफ्ना दुई छिमेकी बसमा रहेको थाहा पाएपछि घटनास्थलमा आएका उनले हेलिकप्टर दुर्घटना हुँदा सबै संयन्त्र प्रयोग गर्ने राज्यले बस दुर्घटना हुँदा खासै वास्ता नगरेको बताए । सुरक्षाकर्मी खटिरहनुभएको छ, उनले भने, भेलबाढीले पानी धमिलो छ, गोताखोरसमेत तल पुगेर खोज्न सक्ने अवस्था छैन । पचास बढी परिवार र आफन्त पीडामा रहेको भन्दै उनले राज्यका सबै संयन्त्र परिचालन गर्न अनुरोध गरे ।

चितवनका प्रमुख जिल्ला अधिकारी इन्द्रदेव यादवले शुक्रबार नेपाली सेना, सशस्त्र प्रहरी र नेपाल प्रहरीका सबै तालिमप्राप्त समूहहरू दिनभर खटिएको बताए । नदीमा पानीको बहाव घटेको छैन । रातिको समयमा भएकाले जोखिम पनि हुने भयो, उनले भने, घटनास्थलबाट तीन/चार किलोमिटर तलसम्म खोज्दा पनि भेटिएन । उनले नदीमा पानीको बहाव उच्च र धमिलो भएका कारण खोजी कार्यमा समस्या भएको बताए।

उनका अनुसार त्रिशूलीमा हराएका बस खोज्न सशस्त्रका चार वटा, नेपाल प्रहरीको एउटा गरी पाँच मोटरबोट, गोताखोर टोली र प्रविधि र स्रोत साधनको समेत प्रयोग गरिएको छ । उनले शुक्रबार केही कपडा भेटिएको भन्दै त्यही ठाउँलाई आधार बनाएर आजै बिहानैबाट उद्धार सुरु गरिने बताए ।

भरतपुर महानगरपालिका–२९ सिमलतालमा शुक्रबार बिहान करिब ३ बजे वीरगञ्जबाट काठमाडौँतर्फ जाँदै गरेको बागमती प्रदेश–०३–००६ ख १५१६ नम्बरको एन्जल डिलक्स बस र काठमाडौँबाट गौरतर्फ जाँदै गरेको बागमती प्रदेश–०३–००१ ख २४९५ नम्बरको बसलाई लेदोसहितको पहिरोले त्रिशूलीमा बगाएको थियो । बसमा सवार तीन जनाले पैडिएर ज्यान जोखाउन सफल भएका थिए । उनीहरूको चितवनका अस्पतालमा उपचार भइरहेको छ ।