निजी क्षेत्रको व्यावसायिक प्रगतिमा सरकार सकारात्मक हुनुपर्छ : वरिष्ठ उपाध्यक्ष ढकाल

नेपाल उद्योग वाणिज्य महासंघका वरिष्ठ उपाध्यक्ष चन्द्रप्रसाद ढकालले निजी क्षेत्रले गरेको व्यावसायिक प्रगतिलाई राज्यले सकारात्मक रूपमा लिनुपर्ने बताएका छन् ।

ललितपुर उद्योग वाणिज्य संघको ४३औँ वार्षिक साधारण सभालाई बिहीबार सम्बोधन गर्दै वरिष्ठ उपाध्यक्ष ढकालले निजी क्षेत्रले व्यावसायिक प्रगति गर्दा समग्र मुलुकको आर्थिक विकास र समृद्धिमा सहयोग पुग्ने भएकाले यसलाई राज्यले सकारात्मक रूपमा लिनुपर्ने बताएका हुन् ।

निजी क्षेत्रले तिर्ने राजस्व र करबाट राज्यले पूर्वाधार निर्माण र आर्थिक गतिविधि विस्तार गर्ने गरेको बताउँदै उनले यदि निजी क्षेत्रले व्यवसायबाट नाफा आर्जन गर्छ भने त्यो रकम उसले नयाँ उद्योग व्यवसाय सुरुवात गर्ने, थप रोजगारी सिर्जना गर्ने र पूर्वाधार निर्माण गर्ने काममै लगाउने हुँदा यसलाई सकारात्मक रूपमा लिन आग्रह गरे ।

“नेपालको सन्दर्भमा निजी क्षेत्र मुलुकको अर्थतन्त्रमा ७० प्रतिशतभन्दा बढी योगदान गर्ने क्षेत्र हो । यसले रोजगारी सिर्जना गरेको छ । सरकारलाई राजस्वमा योगदान गरेको छ र समग्र आर्थिक समृद्धिमा यसको ठूलो योगदान छ,” उनले भने, “त्यसैले राज्यले निजी क्षेत्रलाई हेर्ने दृष्टिकोण सकारात्मक बनाउनुपर्ने हुन्छ । राज्यले निजी क्षेत्रलाई थप विकास र विस्तारका लागि सहजीकरण गर्नुपर्ने हुन्छ ।”

निजी क्षेत्रप्रति राज्यको दृष्टिकोणबाट आममानिसको धारणा बन्ने बताउँदै उनले तीन तहको सरकारबाट आवश्यक सहजीकरण मात्र हुन सकेमा पनि निजी क्षेत्रले छोटो समयमै मुलुकको आर्थिक विकास र समृद्धिका लागि धेरै काम गर्नसक्ने बताए ।

ललितपुर उद्योग वाणिज्य संघले नेपालको उद्योग वाणिज्य क्षेत्रको विस्तारमा पु¥याएको योगदानको चर्चा गर्दै वरिष्ठ उपाध्यक्ष ढकालले आगामी दिनमा महासंघले ललितपुर उद्योग वाणिज्य संघसँग थप सहकार्य गरेर अगाडि बढ्ने प्रतिबद्धतासमेत व्यक्त गरे ।