प्रहरीका असई घूससहित पक्राउ

नेपाल प्रहरीका प्रहरी सहायक निरीक्षक (असई) घुससहित पक्राउ परेका छन् । प्रहरी चौकी खडैचा बाँकेमा कार्यरत प्रहरी सहायक निरीक्षक (असई) गजेन्द्र सिंह भण्डारी घुस सहित पक्राउ परेका हुन् ।

कृषि प्रयोजनको लागि ल्याएको युरिया मलसहित पक्राउ परेको मोटरसाइकल छुटाइदिने भनी घुस/रिसवत माग गरेको उजुरीका आधारमा अख्तियार दुरुपयोग अनुसन्धान आयोगको कार्यालय, बुटवल, सम्पर्क कार्यालय नेपालगञ्जबाट गएको टोलीले पक्राउ गरेको हो ।

भण्डारीले सेवाग्राहीबाट ८ हजार लिइसकेको बताइएको छ । उनलाई नियन्त्रणमा लिई थप अनुसन्धान भइरहेको जनाइएको छ ।