गौशालाबाट अपहरित दुई वर्षीया बालिकाको बालकोटबाट उद्धार, अपहरणकर्ता पक्राउ
१३ पुष २०८० १२:२०
फाइल फोटो
प्रहरीले काठमाडौंको गौशालाबाट अपहरणमा परेकी दुई वर्षीया बालिकाको भक्तपुरको बालकोटबाट सकुशल उद्धार गरेको छ । साथै अपहरणमा संलग्न रहेको अभियोगमा एक जनालाई पक्राउ गरेको छ ।
गौशालाबाट पुस १० गते ती बालिका अपहरणमा परेकी थिइन् ।
काठमाडौं उपत्यका अपराध अनुसन्धान कार्यलय, मीनभवनबाट खटिएको प्रहरीले अपहरणमा संलग्न रहेको अभियोगमा रामेछाप घर भई भक्तपुरको सूर्यविनायक नगरपालिका-३, बालकोट पानीटंकी बस्ने ३७ वर्षीय राज नेपाललाई बिहीबार पक्राउ गरेको हो ।
साथै जिल्ला प्रहरी परिसर, काठमाडौं र जिल्ला प्रहरी परिसर, भक्तपुरको सहयोगमा बालकोट पानीटंकीबाट ती बालिकालाई सकुशल उद्धार गरेर परिवारलाई जिम्मा लगाएको हो ।
पक्राउ परेकालाई थप अनुसन्धान एवं कारबाहीका लागि जिल्ला प्रहरी परिसर काठमाडौं पठाइएको उपत्यका अपराध अनुसन्धान कार्यालयले जनाएको छ ।
प्रतिक्रिया