कोशी प्रदेशमा बजेट प्रतिस्थापन विधेयकप्रति सांसदहरूको असन्तुष्टि

कोशी प्रदेशसभामा प्रस्तुत बजेट प्रतिस्थापन विधेयकप्रति सांसदहरूले असन्तुष्टि जनाएका छन् । प्रदेश सभा बैठकमा भएको छलफलमा बोल्ने क्रमम उनीहरुले असन्तुष्टि जनाएका हुन् ।

अघिल्लो सरकारले अध्यादेशबाट ल्याएको बजेट प्रतिस्थापन गर्न ल्याइएको विधेयकप्रति एमाले र सत्तारुढ दलका सांसदहरुले असन्तुष्टि पोखेका हुन् ।

प्रदेशसभाको सोमबारको बैठकका सहभागी सांसदले उक्त विधेयकको छलफलमा सहभागी भएका थिए । आज मंगलबार पनि यसबारे छलफल जारी रहने भएको छ ।

आर्थिक मामिला तथा योजना मन्त्रालयको जिम्मेवारीमा समेत रहेका मुख्यमन्त्री केदार कार्कीले प्रदेशसभामा अध्यादेशबाट आएको विनियोजन विधेयकलाई प्रतिस्थापन गर्ने विनियोजन ऐन, २०८० गत शनिबार प्रदेशसभामा पेस गरेका थिए ।

छलफलमा सहभागी सांसदहरूले नयाँ योजना छनौट र अध्यादेशमा राखिएका योजना कटौतीबारे आपत्ति जनाएका छन् ।

अघिल्लो सरकारका मुख्यमन्त्री हिक्मतकुमार कार्कीले भदौ २३ गते जारी गरेको अध्यादेश बजेटमा ५० करोड रूपैयाँ थप गर्दै मुख्यमन्त्री कार्कीले प्रतिस्थापन विधेयक ल्याएका हुन् ।

उनले ल्याएको विधेयकमा पहिलेका कार्यक्रमहरू कटौती गरेको भन्दै सांसदहरू असन्तुष्ट बनेका हुन् ।

नेकपा (एमाले) का प्रमुख सचेतक रेवतीरमण भण्डारीले बजेटमाथि एमाले संसदीय दलले गम्भीर असहमति जाहेर गरेको जानकारी दिए । कार्यक्रम पुस्तिकामा राखिएका कार्यक्रम र योजना हटाइएकामा उनले आफूहरूको असन्तुष्टि रहेको बताए ।

एमाले सांसद सिर्जना राईले बजेट हचुवाका भरमा ल्याइएको टिप्पणी गरिन् । यस्तै सांसद कमला दर्नालले आफूहरुले पेस गरेका योजना काटिएको भन्दै आपत्ति जनाइन् । सत्तापक्षकी सांसद खिनु लङ्वा लिम्बूले विनियोजन ऐन, २०८० मा उद्देश्य नभएको, प्राथमिकीकरण नगरेको टुक्राटुक्री योजना मात्रै आएको भन्दै असन्तुष्टि जनाइन् ।