चीनको एक व्यावसायिक भवनमा आगलागी हुँदा कम्तीमा २६ जनाको मृत्यु
३० कार्तिक २०८० १५:०४
उत्तरी चीनको साङ्सी प्रान्तमा बिहीबार एउटा व्यावसायिक भवनमा आगलागी हुँदा कम्तीमा २६ जनाको मृत्यु भएको र दर्जनौं घाइतेलाई अस्पताल पुर्याइएको सरकारी सञ्चारमाध्यमले बताएको छ ।
लुलियाङ सहरको लिसी जिल्लामा रहेको योङ्जु कोइला कम्पनीको चार तले भवनमा स्थानीय समयअनुसार बिहान ६:५० मा आगलागी भएको स्थानीय अधिकारीहरूलाई उद्धृत गर्दै सीसीटीभीले जनाएको छ । उक्त टीभीले आगलागीमा परेर २६ जनाको मृत्यु भएको पुष्टि गरेको हो ।
यसअघि सीसीटीभीले ६३ जनालाई उक्त भवनबाट बाहिर निकालिएको र तीमध्ये ५१ जनालाई उपचारका लागि अस्पताल लगिएको जनाएको थियो । यद्यपि टीभीले अस्पतालमा पुर्याइएकामध्ये कसैको मृत्यु भएको हो/होइन भन्नेबारे केही बताएको छैन ।
‘उद्धार कार्य जारी छ र कसरी आगलागी भयो भन्नेबारे अनुसन्धान भइरहेको छ,’ सीसीटीभीले भनेको छ, ‘आगो अहिले नियन्त्रणमा आइसकेको छ ।’
प्रतिक्रिया