टिकटक र फेसबुकमार्फत महिलाको चरित्रहत्या गरेको आरोपमा एक जना पक्राउ
२३ कार्तिक २०८० १६:५४
फाइल फोटो
सामाजिक सञ्जाल टिकटक र फेसबकुमार्फत महिलाको चरित्रहत्या गरेको आरोपमा एक जना पक्राउ परेका छन्।
प्रहरीको केन्द्रीय अनुसन्धान ब्यूरो (सीआईबी) ले सिरहाको लहान नगरपालिका-२४ घर भई हाल काठमाडौं बस्ने ३६ वर्षीय मनोज मानव भन्ने मनोजकुमार महतोलाई बुधबार पक्राउ गरेको हो।
उनले टिकटक र फेसबुकमार्फत पीडित महिलाको तस्बिर तथा श्रव्यदृश्य सामग्री दुरूपयोग गरी चरित्रहत्या गर्ने उद्देश्यले क्याप्सनसमेत लेखेर प्रकाशन तथा प्रसारण गरेको उजुरी ब्यूरोमा परेको थियो।
सीआईबीको टोलीले अनुसन्धान तथा प्राविधिक विश्लेषण गर्ने क्रममा उक्त कार्यमा महतोको संलग्नता खुलेपछि उनलाई काठमाडौंबाट पक्राउ गरेको हो।
उनीविरूद्ध विद्युतीय कारोबार ऐन, २०६३ बमोजिमको कसुरमा काठमाडौं जिल्ला अदालतबाट ७ दिन म्याद थप अनुमति लिएर थप अनुसन्धान भइरहेको प्रहरीले जनाएको छ।
प्रतिक्रिया