चालु खाता र शोधनान्तर बचतमा, मुद्रा सञ्चिति एक वर्षको आयात धान्न पर्याप्त तर बढ्यो महँगी

चालु खाता र शोधनान्तर स्थिति बचतमा देखिएको छ । नेपाल राष्ट्र बैंकले सार्वजनिक गरेको साउन–भदौको वित्तीय प्रतिवेदनअनुसार चालु खाता २३ अर्ब ५० करोड पैयाँले बचतमा देखिएको छ । अघिल्लो वर्षको सोही अवधिमा चालू खाता ३६ अर्ब ८४ करोड रुपैयाँले घाटामा थियो । त्यस्तै भदौ मसान्तसम्ममा शोधनान्तर स्थिति ५३ अर्ब ६१ करोड रुपैयाँले बचतमा छ । अघिल्लो वर्षको सोही अवधिमा शोधनान्तर स्थिति २० अर्ब ८१ करोडले घाटामा थियो ।

गत असार मसान्तसम्म १५ खर्ब ३९ अर्ब ३६ करोडबराबर रहेको विदेशी विनिमय सञ्चिति ३.९ प्रतिशतले बढेको छ । बढेपछिको सञ्चिति १५ खर्ब ९८ अर्ब ९० करोड रुपैयाँ पुगेको छ । कुल विदेशी विनिमय सञ्चितिमध्ये राष्ट्र बैंकमा १४ खर्ब ६ अर्ब ५२ करोड र बैंक तथा वित्तीय संस्थासँग १ खर्ब ९३ अर्ब ५९ करोड रुपैयाँ छ ।

चालू आर्थिक वर्षको दुई महिनाको आयातलाई आधार मान्दा हालको विदेशी विनिमय सञ्चितिले १२.६ महिनाको वस्तु आयात र १०.३ महिनाको वस्तु तथा सेवा आयात धान्न पर्याप्त रहेको राष्ट्र बैँकले जनाएको छ ।

समीक्षा अवधिमा आयात ५.१ प्रतिशत निर्यात ७.८ प्रतिशत र कुल वस्तु व्यापार घाटा ४.७ प्रतिशतले घटेको वित्तीय विवरणमा उल्लेख छ ।

साढे दुई खर्ब रेमिट्यान्स भित्रियो
चालु आर्थिक वर्ष ०८०–८१ को पहिलो दुई महिनामा करिब साढे दुई खर्ब रेमिट्यान्स नेपाल भित्रिएको छ ।

नेपाल राष्ट्र बैंकले सार्वजनिक गरेको साउन–भदौको वित्तीय प्रतिवेदनअनुसार रेमिट्यान्स आप्रवाह २२.१ एक प्रतिशतले बढेर २ खर्ब २८ अर्ब ३७ करोड रुपैयाँ पुगेको छ । अघिल्लो वर्षको सोही अवधिमा रेमिट्यान्स आप्रवाह १९. ८ प्रतिशतले बढेको थियो । अमेरिकी डलरमा विप्रेषण आप्रवाह १७.७ प्रतिशतले वृद्धि भई १ अर्ब ७३ करोड अमेरिकी डलर पुगेको राष्ट्र बैँकले जनाएको छ ।

त्यस्तै समीक्षा अवधिमा वैदेशिक रोजगारीका लागि श्रम स्वीकृति लिनेको संख्या भने घटेको छ । २८.३ प्रतिशतले घटेर सो संख्या ७४ हजार चार सय ५५ रहेको छ । त्यसैगरी, वैदेशिक रोजगारीका लागि पुनः श्रम स्वीकृति लिनेको संख्या १८.३ प्रतिशतले घटेर ३२ हजार चार कायम भएको राष्ट्र बैंकले जनाएको छ । अघिल्लो वर्ष सोही अवधिमा यस्तो संख्या ७०.६ प्रतिशतले बढेको थियो ।

मुद्रास्फीति ८.१९ पुग्यो
त्यसैगरी समीक्षा अवधिमा वार्षिक बिन्दुगत आधारमा उपभोक्ता मूल्य सूचकांकमा आधारित मुद्रास्फीति ८.१९ प्रतिशत पुगेको छ । सरकारले चालू आर्थिक वर्षमा मूल्यवृद्धि साढे ६ प्रतिशतको भित्र राख्ने लक्ष्य राखेको छ ।

राष्ट्र बैंकका अनुसार दुई महिनामा मरमसलामा ४५.४६ प्रतिशतसम्म मूल्यवृद्धि देखिएको छ । त्यस्तै, चिनी तथा चिनीजन्य वस्तुमा १७.८६ प्रतिशत, तरकारीमा १४.५१ प्रतिशत, खाद्य तथा खाद्यजन्य पदार्थमा १३.३८ प्रतिशत र दुग्ध पदार्थ तथा अण्डामा १२.६० प्रतिशत मूल्य बढेको छ ।

यो अवधिमा घिउ तथा तेल उपसमूहको मूल्य सूचकांक भने १३.०८ प्रतिशतले घटेको छ ।

गैरखाद्य तथा सेवा समूहअन्तर्गत मनोरञ्जन तथा संस्कृति उपसमूहको वार्षिक बिन्दुगत उपभोक्ता मूल्य सूचकांक १५.५५, विविध वस्तु तथा सेवा १२.२१ प्रतिशत, शिक्षा क्षेत्रमा ९.१० प्रतिशत, घरायसी उपयोगका वस्तुमा ८.११ प्रतिशत र फर्निसिङ तथा घरायसी उपकरणमा ६.५९ प्रतिशतले मूल्य बढेको छ । भदौ मसान्तसम्ममा यातायात क्षेत्रको मुद्रास्फीति ०.१८ प्रतिशतले घटेको छ ।