सवा दुई अर्ब रूपैयाँ खर्चेर पैदलमार्ग सुधार गर्दै काठमाडौं महानगर

काठमाडौँ महानगरपालिकाले चालु आर्थिक वर्षमा दुई अर्ब १५ करोड रूपैयाँ लागतमा पैदलमार्गको मर्मत तथा सुधार गर्ने भएको छ। यसका लागि सबैजसो सडक खण्डको लागत अनुमान तयार भइसकेको र केही क्षेत्रमा सम्झौता भई काम सुरू पनि भइसकेको महानगरका सार्वजनिक निर्माण विभागका निर्देशक सुरेशकुमार राईको भनाइ छ।

हाल महानगर क्षेत्रभित्र करिब एक हजार तीन सय किलोमिटर सडक सञ्जाल छ। यसमध्ये आठ मिटरभन्दा कम चौडाइ भएका एक हजार किलोमिटर सडक महानगरको स्वामित्वमा छ।

महानगरका अनुसार हाल वडा नं. २६ लैनचौरबाट वडा नं १६ सोह्रखुट्टे हुँदै बालाजुसम्मको सडक किनारा दुवैतर्फ चार करोड ५५ लाख रूपैयाँमा काम भइरहेको छ। वडा नं. २६ लैनचौरबाट वडा नं २ को लाजिम्पाट, वडा नं ३ को महाराजगञ्ज हुँदै चक्रपथसम्मको खण्डका लागि १० करोड रूपैयाँमा सम्झौता भइसकेको छ।

साथै वडा नं. २८ को प्रदर्शनीमार्गमा काम सुरू भइसकेको छ। यसको लागत तीन करोड ७८ लाख रूपैयाँ रहेको छ। वडा नं. ११ को त्रिपुरेश्वरदेखि वडा नं. २२ सुन्धारा, वडा नं २७ र २८ को सिमाना महाबौद्ध, रत्नपार्क, जमल हुँदै वडा नं २६ को लैनचौरसम्मको सडक खण्डका लागि निर्माण पक्षसँग १८ करोड रूपैयाँमा सम्झौता भइसकेको छ निर्देशक राईले जानकारी दिए।

महानगरको वडा नं. ४ को बालुवाटार सडक खण्डमा निर्माणका लागि छ करोड ३५ लाख रूपैयाँमा सम्झौता भएको छ। वडा नं. ३२ को तीनकुनेदेखि वडा नं ९ सिनामङ्गल, त्रिभुवन विमानस्थल प्रवेशद्वार, सञ्चारग्राम, तिलगङ्गाहुँदै वडा नं. ८ को गौशालासम्मका लागि छ करोड ६९ लाख रूपैयाँमा सम्झौता भएको छ। त्यसैगरी वडा नं. १० नयाँबानेश्वरदेखि वडा नं ९ पुरानो बानेश्वरसम्मका लागि तीन करोड २३ लाख रूपैयाँ बजेट विनियोजन गरिएको छ।

वडा नं. २८ को बागबजारदेखि वडा नं. २९ चारखाल, वडा नं. ३० को सिमाना डिल्लीबजार पिपलबोट, मैतीदेवी चोक, सेतो पुल, वडा नं. ९ को पुरानो बानेश्वर, वडा नं. ३१ को भीमसेनगोलाहुँदै वडा नं. ९ को सिनामङ्गल सडक खण्डका लागि १० करोड रूपैयाँ बजेट छुट्याइएको छ।

साथै वडा नंं. १३ को कालीमाटीदेखि सोल्टीमोडहुँदै वडा नं. १४ को कलङ्कीसम्म, वडा नं. ८ को गौशालादेखि वडा नं. ७ को चावहिलसम्म, वडा नं. ८ गौशालादेखि वडा नं. ९ रातो पुलसम्मको सडक खण्डलाई १० करोड रूपैयाँ खर्च हुने अनुमान गरिएको छ।

अन्य केही सडकका पनि कतै सम्झौता अन्तिम चरणमा पुगेको छ भने कतै काम सुरु भइसकेको विभागले जानकारी दिएको छ। चालु आवमा महानगरले पूर्वाधार निर्माण तथा सुधारका लागि सात अर्ब ३४ करोड ६४ लाख ७१ हजार रूपैयाँ बजेट विनियोजन गरेको छ।