अनलाइन बेटिङबाट २४ करोडको कारोबार गरेको आरोपमा एक जना पक्राउ

अनलाइन बेटिङबाट २४ करोड रूपैयाँ बराबरको कारोबार गर्ने एक जनालाई प्रहरीले पक्राउ गरी आज सार्वजनिक गरेको छ। काठमाडौँ उपत्यका अपराध अनुसन्धान कार्यालयको टोलीले निजलाई पक्राउ गरेको हो।

पक्राउ पर्नेमा झापा दमक नगरपालिका-१२ घर भएका ३० वर्षीय पिन्टुकुमार साह रहेका उपत्यका अपराध अनुसन्धान कार्यालय काठमाडौँ मीनभवनका प्रवक्ता तथा प्रहरी उपरीक्षक रवीन्द्र रेग्मीले राससलाई जानकारी दिए।

उनका अनुसार इन्टरनेटको दुरूपयोग गरी अनलाइन जुवा, सट्टाबाजीजस्ता अनलाइन खेलहरू खेली÷खेलाई सहभागी भएकाले नेपाल राष्ट्र बैंकको नियमविपरीत गैरकानूनी रूपमा २४ करोड पन्ध्र लाख १७ हजार एक सय ३८ रूपैयाँ बराबर रकमको कारोबार गर्ने कार्यमा संलग्न रहेको आधारमा निजलाई झापाबाट पक्राउ गरी काठमाडौँ ल्याइएको हो।

पक्राउ परेका साहलाई जुवा खेल्न वा सट्टाबाजी गर्न नहुने कसुरमा आवश्यक अनुसन्धान एवं कारबाहीका लागि जिल्ला प्रहरी परिसर, टेकु, काठमाडौँमा पठाइएको प्रवक्ता तथा प्रहरी उपरीक्षक रेग्मीले बताए।