तस्करीको थप ३ किलो सुनसहित दोलखाबाट एक जना पक्राउ

दोलखामा तस्करीको थप ३ किलो सुनसहित एक जना पक्राउ परेका छन्।

प्रहरीको केन्द्रीय अनुसन्धान ब्यूरो (सीआईबी) को टोलीले चीनबाट तस्करी गरेर भित्र्याएको  ३ किलो सुनसहित शुक्रबार दोलखाको जामुनेबाट केशव तामाङलाई पक्राउ गरेको हो।

सोही जिल्लाबाट बिहीबार ४ किलो सुनसहित एकै गाउँका ५ जना पक्राउ परेको भोलिपल्ट थप ३ किलो सुनसहित तामाङ पक्राउ परेका हुन्।

तस्करीको उक्त सुन चीनको नाकाबाट लामाबगर हुँदै भित्रिएको हुन सक्ने अनुमान प्रहरीले गरेको छ।

प्रहरीले संगठित रूपमा हुने सुन तस्करीको अनुसन्धान जारी राखेका समयमा यसका तस्करहरूले भने विभिन्न नाका र हवाईमार्ग भएर यसलाई निरन्तरता दिइरहेको पाइएको छ।