टर्कीमा भूकम्पपछिको पुनःनिर्माणको काममा लगाइदिने भन्दै एक करोड बढी ठगी, महिला पक्राउ
९ असोज २०८० १४:१७
वैदेशिक रोजगारीका लागि टर्की पठाइदिने भन्दै ठगी गरेको आरोपमा एक महिला पक्राउ परेकी छन्।
पक्राउ पर्नेमा कास्कीको पोखरा महानगरपालिका-५, लेखनाथ टोलकी सुरूचि भुजेल छिन्।
प्रहरीको केन्द्रीय अनुसन्धान ब्यूरो (सीआईबी) को टोलीले उनलाई लेखनाथ टोलबाट शनिवार पक्राउ गरेको हो।
भुजेल र उनकै ठेगाना भएका सिर्जनकुमार राईसमेतले टर्कीमा गएको भूकम्पपश्चात् पुनःनिर्माणका लागि संयुक्त राष्ट्रसंघ (यूएन) ले सहयोग गर्ने उद्देश्यले कामदार माग गरेको भन्दै ठगी गरेको आरोप छ।
उनीहरूले ३० जनाबाट १ करोड १५ लाख ९९ हजार ८ सय रूपैयाँ ठगी गरेको जाहेरी परेको छ।
सीआईबीका प्रवक्ता प्रहरी उपरीक्षक (एसपी) नवराज अधिकारीका अनुसार उनीहरूले पुनःनिर्माणको काममा यूएनले मासिक १ हजार ४ सय अमेरिकी डलर तलब दिने भनी पीडितहरूलाई प्रलोभनमा पारेका थिए।
पक्राउ परेकी भुजेलविरूद्ध काठमाडौं जिल्ला अदालतबाट ७ दिनको म्याद लिएर ठगीसम्बन्धी कसुरमा अनुसन्धान भइरहेको सीआईबीले जनाएको छ।
साथै यस ठगीमा परेका व्यक्तिहरूलाई यथाशीघ्र सम्पर्कमा आउनसमेत सीआईबीले आग्रह गरेको छ।
सम्बन्धित समाचार
प्रतिक्रिया