चिकित्सकहरूको आन्दोलन स्थगित, सरकारसँग ६ बुँदे सहमति

मकवानपुरको हेटौंडामा दुई जना चिकित्सकहरूमाथि कुटपिट भएको घटनाको विरोधमा आइतबार स्वास्थ्य संस्थाका आकस्मिकबाहेकका सेवा बन्द गरेर आन्दोलनमा उत्रिएका चिकित्सकहरूको आन्दोलन स्थगित भएको छ।

सरकार र आन्दोलनरत चिकित्सकबीच आइतबार साँझ ६ बुँदे सहमति भएसँगै आन्दोलन स्थगित भएको हो।

हेटौंडास्थित सञ्चो अस्पतालका दुई जना डाक्टरलाई बिरामीका आफन्तले कुटपिट गरेको घटनाको विरोधमा चिकित्सकहरू आन्दोलनमा होमिएका थिए।

चिकित्सकहरू आन्दोलनमा उत्रिएपछि स्वास्थ्य मन्त्रालयले आजै वार्ता समिति बनाएको थियो।

सरकार र चिकित्सकबीच भएको सहमतिमा सञ्चो अस्पतालमा डाक्टरमाथि कुटपिट गर्ने अभियोगमा पक्राउ परेका ४ जना र पक्राउ पुर्जी जारी भएका अरू ५ जनालाई पक्राउ गरी स्वास्थ्यकर्मी तथा स्वास्थ्य संस्थाको सुरक्षासम्बन्धी ऐन, २०६६ अनुसार कारबाही गर्ने, उक्त ऐन कार्यान्वयनमा सरकारका सरोकारवाला निकाय प्रतिबद्ध रहने, स्वास्थ्यकर्मी तथा स्वास्थ्य संस्था सुरक्षा समन्वय समितिलाई सक्रिय बनाउनेलगायत बुँदामा सहमति भएको छ।