घुमुवा प्रहरी हुँ भन्दै लुटपाट गर्ने एक जना पक्राउ

धनुषा प्रहरीले आफूलाई घुमुवा प्रहरी बताउँदै लुटपाट गर्ने एक जनालाई पक्राउ गरेको छ। पक्राउ पर्नेमा धनुषाको कमला नगरपालिका-३, लग्माका ३१ वर्षीय अमरेशकुमार यादव रहेको प्रहरीले जनाएको छ। अर्का एक जना फरार छन्।

पक्राउ परेका अमरेशकुमार यादव र फरार रहेका अन्य एक जनाले आफूलाई घुमुवा प्रहरी हुँ भनेर धाकधम्की देखाई धनुषाको विदेह नगरपालिका-३, चिकनास्थित सडकखण्डमा मोटरसाइकलमा सवार यात्रुहरूसंग ४ हजार रूपैयाँ नगद लुटेर भागेका थिए।

सो घटनाको खबर प्राप्त हुनासाथ इलाका प्रहरी कार्यालय दुहवी धनुषाबाट खटिएको प्रहरी टोलीले अमरेशकुमार यादवलाई पक्राउ गरेको हो।

पक्राउ परेका यादवमाथि अनुसन्धान प्रक्रिया अगाडि बढाइएको छ भने फरार रहेका अन्य एक जना व्यक्तिको खोजी भइरहेको धनुषा प्रहरीले जनाएको छ।