लागत र समय घटाएर फास्ट ट्र्याकको डीपीआर संशोधन
३१ साउन २०८० १४:०७
५ वैशाख, २०८० मा फास्ट ट्र्याकको अवलोकन एवं निरीक्षणका क्रममा प्रधानमन्त्री पुष्पकमल दाहाल ‘प्रचण्ड’, उपप्रधानमन्त्री तथा रक्षामन्त्री पूर्णबहादुर खड्का, भौतिक पूर्वाधार तथा यातायातमन्त्री प्रकाश ज्वाला, अर्थमन्त्री डा. प्रकाशशरण महत,
तत्कालिन मुख्यसचिव शंकरदास वैरागी, प्रधानसेनापति प्रभुराम शर्मालगायत।
काठमाडौँ-तराई/मधेस द्रुतमार्ग (फास्ट ट्र्याक) को विस्तृत परियोजना प्रतिवेदन (डीपीआर) संशोधन गरिएको छ । लागत समय र लागत मूल्य घट्ने गरी द्रुतमार्गको प्रतिवेदन संशोधन गरिएको भौतिक पूर्वाधार तथा यातायातमन्त्री प्रकाश ज्वालाले जानकारी दिए ।
मङ्गलबार बसेको मन्त्रिपरिषद्को बैठकले काठमाडौँ-तराई/मधेस द्रुतमार्गको डीपीआर संशोधनको निर्णय गरेको हो । झण्डै दुई अर्ब रूपैयाँ घट्ने र निर्माणको समय पनि घट्ने गरी द्रुतमार्गको डीपीआर संशोधन भएको मन्त्री ज्वालाले बताए । उनले भने, ‘सुरूङमार्ग थपिँदा सडकको लम्बाइ र मूल्य दुबै घट्यो ।’
काठमाडौँ-मधेस ‘लाइफ लाइन’ का रूपमा रहेको द्रुतमार्ग नेपाली सेनाको व्यवस्थापनमा निर्माण भइरहेको छ । वि. सं. २०७४ वैशाख २१ देखि निर्माण सुरू गरिएको काठमाडौँ-तराई/मधेस द्रुतमार्गको हालसम्म २५ दशमलव ५४ प्रतिशत मात्र प्रगति भएको छ र वि. सं. २०८३ साल चैत मसान्तसम्म सक्ने लक्ष्य लिइएको छ ।
द्रुतमार्गको प्रगति कमजोर देखिएपछि मन्त्री ज्वालाले नेपाली सेनासँग असन्तुष्टि जनाए । द्रुतमार्गको काम द्रुतगतिमा हुनुपर्ने भए पनि प्रगति हेर्दा आशावादी नभएको नेपाली सेनाका अधिकारीलाई मन्त्री ज्वालाले बताएका थिए ।
प्रतिवेदन संशोधन भएपछि लागत मूल्य पनि घट्ने भएको छ । दुई खर्ब १३ अर्ब नौ करोड ५३ लाख रूपैयाँको लागत रहेकामा संशोधनपछि दुई खर्ब ११ अर्ब नौ करोड ३० लाख रूपैयाँ आयोजनाको लागत रहने भएको छ ।
प्रतिक्रिया