दुई दिनदेखि कालीगण्डकी करिडोर ठप्प

राष्ट्रिय गौरवको आयोजनाका रूपमा रहेको कालिगण्डकी करिडोरको बागलुङ खण्ड दुई दिनदेखि अवरूद्ध छ।

निरन्तरको वर्षाले पहिरो झर्ने क्रम नरोकिएका कारण पहिरो पन्छाउन समस्या हुँदा सडक अवरूद्ध जारी रहेको हो। बागलुङ नगरपालिका-१०, दबल्याङमा दुई दिनदेखि सडक अवरूद्ध भएको छ। बागलुङमा लगातारको वर्षाका कारण दक्षिण भेग जोड्ने सडक सम्बन्धविच्छेद भएको हो।

दब्ल्याङ हुँदै बलेवा कुश्मिसेरा जाने सडकसमेत गए रातिदेखि बन्द छ। वर्षा नरोकिएका कारण सडक खुलाउन नसकिएको जिल्ला प्रहरी कार्यालय, बागलुङका सूचना अधिकारी प्रहरी नायब उपरीक्षक मदन केसीले जानकारी दिए।

करिडोरको दब्ल्याङमा यही साउन २६ गतेदेखि लगातार लेदो बगिरहेका कारण सवारी चल्न सकेका छैनन्। सडक अवरूद्ध हुँदा दुई दिनदेखि बागलुङको दक्षिण भेग जोड्ने बलेवा, जैमिनी नगरपालिका र बरेङ गाउँपालिका जिल्ला सदरमुकामसँगको सडक सञ्जालबाट टुटेको छ।

दबल्याङको पहाड गहिरिएर पहिरो गएका कारण बलेवा, भकुण्डे, कुश्मिसेरा र बरेङ जाने सवारी साधन अलपत्र परेका छन्। यस्तै बागलुङ बजारदेखि तित्याङ हुँदै भकुण्डे जाने सडकसमेत अवरूद्ध बनेको छ।