भाजपाको निमन्त्रणामा माआवोदी शीर्ष नेताहरू भारत भ्रमणमा जाँदै

भारतको सत्तारूढ दल भारतीय जनता पार्टी (भाजपा) को निमन्त्रणामा नेपालको सत्तारूढ दल नेकपा (माओवादी केन्द्र) का शीर्ष नेताहरू भारत भ्रमणमा जाने भएका छन्।

भाजपाका अध्यक्ष जेपी नड्डाले पार्टी मुख्यालयमा आयोजित एक कार्यक्रममा माओवादी केन्द्रका शीर्ष नेताहरूको प्रतिनिधिमण्डलले भाजपाको निमन्त्रणामा भारत भ्रमण गर्ने जानकारी दिएका हुन्।

भाजपा विदेश विभागद्वारा आयोजित भाजपाबारे जानकारी दिने कार्यक्रममा बोल्दै नड्डाले निकट भविष्यमै माओवादी केन्द्रका शीर्ष नेताहरूको प्रतिनिधिमण्डलले भारत भ्रमण गर्ने बताए।

विभिन्न देशका राजनीतिक दलका नेताहरूलाई भाजपाले भारतमा बोलाएर पार्टीको गतिविधिबारे जानकारी गराउने गरेको छ। नड्डाले भने, ‘विभिन्न देशका राजनीतिक पार्टीहरूसँग आफ्नो सम्बन्ध बढाउने उद्देश्यका साथ हामीले विभिन्न देशका राजनीतिक दलहरूको प्रतिनिधिहरूलाई यहाँ भारतमा बोलाउने गरेका छौं र हाम्रा पार्टीका प्रतिनिधिहरू विभिन्न देशहरूमा जाने गरेका छन्।’

नेपालका प्रधानमन्त्री तथा माओवादी केन्द्रका अध्यक्ष पुष्पकमल दाहाल ‘प्रचण्ड’ ले पनि नड्डाको निमन्त्रणामा गत वर्ष भारतको भ्रमण गरेका थिए।