नेप्से परिसूचकमा दोहोरो अंकको गिरावट

धितोपत्र बजारमा शेयर कारोबार मापक नेप्से परिसूचक आज पनि दोहोरो अङ्कले ओरालो लागेको छ। नेपाल स्टक एक्सचेञ्जका अनुसार नेप्से परिसूचक २१ दशमलव ३२ अङ्कले ओरालो लागेर दुई हजार ७५ दशमलव ९७ मा सीमित भएको छ।

ठूला कम्पनीको कारोबार मापन गर्ने सेन्सेटिभ परिसूचक चार दशमलव १७ अङ्कले ओरालो लागेर तीन सय ८६ दशमलव ३५ मा सीमित भएको छ। कारोबार भएका कुल १३ उपसमूहमध्ये दुई उपसमूहको शेयर मूल्यमा वृद्धि हुँदा ११ उपसमूहको शेयर मूल्यमा भने गिरावट आएको छ। कुल ९४ लाख १८ हजार नौ सय ५२ कित्ता शेयर चार अर्ब पाँच करोड १० लाख ७८ हजार तीन सय ७५ रूपैयाँ मूल्यमा खरिद बिक्री भएका छन्।

कारोबारका आधारमा हिमालयन लाइफ इन्स्योरेन्स शीर्ष स्थानमा रहेको छ। सो कम्पनीको २३ करोड ९४ लाख ४५ हजार सात सय ८५ रूपैयाँ बराबरको कारोबार भएको छ। यस्तै सोल्टी होटल २० कोड ९४ लाख ३९ हजार दुई सय ८५, नागरिक लगानी कोष२० करोड ३३ लाख २५ हजार पाँच सय ५४, शिवम् सिमेन्ट १८ करोड १८ लाख दुई हजार, एनएलजी इन्स्योरेन्स कम्पनी १४ करोड नौ लाख ९० हजार एक सय २२ रूपैयाँ बराबरको कारोबार भई शीर्ष पाँचभित्र पर्न सफल भएका छन्।

नेप्सेका अनुसार सीवाईसीएल नेपाल लघुवित्त र बीपीडब्ल्यू लघुवित्तको शेयर मूल्यमा १० प्रतिशतले वृद्धि भई सकारात्मक सर्किट लागेको छ। सिटी होटल नौ दशमलव ९८, चन्द्रागिरि हिल्स तीन दशमलव ६८ र एनएलजी इन्स्योरेन्सका लगानीकर्ताले दुई दशमलव ८१ प्रतिशतले कमाएका छन्।

त्यस्तै लक्ष्मी इक्विटी फण्ड आठ दशमलव ९५, सामुदायिक लघुवित्त सात दशमलव १३, पाँचथर पावर कम्पनी छ दशमलव शुन्य एक, सयपत्री हाइड्रोपावर पाँच दशमलव ४१ र एनआईसी एशिया ब्यालेन्स फण्डका लगानीकर्ताले चार दशमलव ८४ प्रतिशतले गुमाएका छन्।