अहिलेकाे पुस्तालाई भ्रष्टाचार नगरी विकास गर्न सक्ने नेतृत्व चाहिएको छ : अध्यक्ष तिमिल्सिना

राष्ट्रियसभाका अध्यक्ष गणेशप्रसाद तिमिल्सिनाले नयाँ पुस्तालाई इमान्दारिता र विकास चाहिएको बताएका छन्।

पिताम्बर शर्मा पौडेलद्वारा लिखित ‘अनुभव र अनुभूति’ नामक पुस्तकको विमोचनमा आज काठमाडाैंमा सम्बोधन गर्दै उनले अहिलेकाे पुस्तालाई भ्रष्टाचार नगरी विकास गर्ने र स्वदेशमै रोजगारी दिन सक्ने नेतृत्वको खाँचो रहेको बताएका हुन्।

समाज परिवर्तनसँगै देशले गति लिन नसक्नुले अहिलेको पुस्ता निराश बन्दै गएको उनकाे भनाइ छ। देशको नेतृत्व गर्नेले भोगेको भोगाइ अहिलेको पुस्ताले खासै वास्ता नगर्ने भन्दै उनले भने, ‘नयाँ पुस्ता देशको समृद्धि र न्यायपूर्ण समाजको खोजीमा छ तर परिवर्तनबाट जुन अनुभूति पाउनुपर्ने हो त्यो नहुँदा जनता विचलित हुने अवस्थामा आइपुगेका छन्।’

राजनीतिक परिवर्तनलाई संस्थागत गर्दै अहिलेको पुस्ताको आवश्यकता पूरा गर्नतर्फ राज्य लाग्नुपर्ने समय आएको उनकाे भनाइ छ। उनले रूपान्तरणका लागि सबै लाग्नुपर्ने बताए।

जिम्मेवारीमा रहेका नेताको त्याग महत्त्वपूर्ण भए पनि त्यागअनुसारको आम नागरिकलाई अनुभूति दिलाउन नसक्दा जनतामा निराशा छाएको उनकाे भनाइ थियो। नेपाल शिक्षक सङ्गठनका संस्थापक केन्द्रीय सचिवसमेत रहेका पौडेलले शिक्षा क्षेत्रमा गरेकाे परिवर्तनअनुसार अहिलेको शिक्षालाई अघि बढाउन सक्नुपर्ने तिमिल्सिनाले बताए।

समाज परिवर्तन र शिक्षा क्षेत्रको विकासका लागि पौडेल परिवारको महत्त्वपूर्ण भूमिका रहेको उनले बताए। भरतपुर महानगरपालिका-१४ मा रहेको पिता-शिक्षा गुठीले आयोजना गरेको सो कार्यक्रममा प्रमुख जिल्ला अधिकारी सुरेन्द्र पौडेल, डा. सूर्यराज आचार्य, शिक्षाविद् रमाकान्तर सापकोटा, प्राध्यापक केदारनाथ खनाल, एकनारायण पौडेललगायतले पुस्तकको समीक्षा एवं टिप्पणी गरेका थिए।

गुठीकी उपाध्यक्ष होमादेवी पौडेलको अध्यक्षतामा सम्पन्न कार्यक्रममा श्रीराम देवकोटा, गुठीका सचिव लोकनाथ पौडेललगायतले बोलेका थिए।