स्रोत नखुलेको साढे १५ लाख रूपैयाँसहित सर्लाहीमा दुई जना पक्राउ
५ असार २०८० १७:४१
फाइल तस्बिर।
सर्लाहीमा स्रोत नखुलेको नेपाली र भारतीय रकमसहित दुई जना पक्राउ परेका छन्।
पक्राउ पर्नेहरूमा सर्लाहीको मलंगवा नगरपालिका-४ बस्ने ३५ वर्षीय विसुन्द्रप्रसाद चौधरी र सोही नगरपालिका-२ बस्ने ४० वर्षीय नागेन्द्र ठाकुर छन्।
जिल्ला प्रहरी कार्यालय सर्लाही र प्रहरी चौकी गोरखकालीबाट खटिएको संयुक्त प्रहरी टोलीले उनीहरूलाई मंगलबार बिहान मलंगवा नगरपालिका-८, गोरखकाली चोकबाट पक्राउ गरेको हो।
उनीहरूका साथबाट स्रोत नखुलेको १५ लाख ५० नेपाली रूपैयाँ र २ हजार ६ सय ४० भारतीय रूपये बरामद भएको छ।
भारतको सोनवर्षाबाट नेपालतर्फ आउँदै गरेको उनीहरू सवार बीआर ३० एस २०८६ नम्बरको मोटरसाइकललाई जाँच गर्ने क्रममा उक्त नगद फेला परेपछि पक्राउ गरिएको र थप अनुसन्धान भइरहेको प्रहरीले जनाएको छ।
प्रतिक्रिया