कूटनीतिक क्षेत्रमा राजनीतिक नियुक्ति गर्ने परम्परा अन्त्य हुनुपर्छ : राजेन्द्र लिङ्देन
४ असार २०८० १५:५३
राष्ट्रिय प्रजातन्त्र पार्टीका अध्यक्ष तथा सांसद राजेन्द लिङ्देनले राष्ट्रियता र राष्ट्रिय स्वाधीनतालाई केन्द्रविन्दुमा राखेर मुलुकको अन्तर्राष्ट्रिय छविलाई विश्वसनीय तुल्याउनुपर्ने बताएका छन्।
प्रतिनिधिसभाको आजको बैठकमा विभिन्न मन्त्रालयका बजेट शीर्षकमाथिको छलफलमा भाग लिँदै सांसद लिङ्देनले छिमेकी र विदेशीसँग कुरा गर्दा कोही रिसाउँछन् कि भन्ने कमजोर मानसिकताका आधारमा नभई मुलुकको स्वाभिमान र प्रतिष्ठालाई ध्यान दिएर गर्नुपर्ने बताए।
उनले कूटनीतिक क्षेत्रमा नियुक्ति गर्दा राजनीतिक रूपमा गर्ने परम्पराको अन्त्य गर्न परराष्ट्र मन्त्रालय गम्भीर हुनुपर्ने बताए।
रासायनिक मलको बर्सेनि अभाव हुने समस्या अन्त्यका लागि स्वदेशमै मल कारखाना स्थापनाका लागि लगानीकर्तालाई प्रवर्द्धन गर्नुपर्ने सांसद लिङ्देनको भनाइ थियो। उमेर पुगेर पनि नेपाली नागरिकले नागरिकता नपाउने अवस्थाको अन्त्य हुनुपर्नेमा उनले जोड दिए।
‘बाबुआमा नेपाली भएर पनि नागरिकताविहीन हुने अवस्था विडम्बनापूर्ण छ,’ सांसद लिङ्देनले भने, ‘यस्तो अवस्था हुनुहुँदैन। नागरिकतासम्बन्धी नयाँ विधेयक अहिलेको संसद्मा ल्याइओस्। हामी छलफल गरेर छिटो पारित गर्न तयार छौँ।’
प्रतिक्रिया