मदिरा उत्पादकदेखि बिक्रेतासम्मको लाइसेन्स र नवीकरण दस्तुर बढ्यो

सरकारले आर्थिक विधेयक-२०८० मार्फत मदिरा र सूर्तीजन्य वस्तुको उत्पादक, वितरक तथा बिक्रेताको इजाजतपत्र (लाइसेन्स) र नवीकरण दस्तुर बढाएको छ । आर्थिक विधेयकमार्फत अन्तःशुल्क नियमावली, २०७९ मा भएको संशोधन तथा परिमार्जनबारे आन्तरिक राजस्व विभागले शुक्रबार सार्वजनिक गरेको विवरणअनुसार स्प्रिट, बियर, इथानोल र अन्य मरिदा उत्पादन गर्ने प्रतिष्ठानको लाइसेन्स र नवीकरण दस्तुर ५५ हजार रूपैयाँले बढेको हो ।

यसअघि यस्तो शुल्क एक लाख ९५ हजार रूपैयाँ बराबर रहेकामा त्यसलाई बढाएर दुई लाख ५० हजार रूपैयाँ पुर्‍याइएको छ । वाइन, ब्रान्डीजस्ता फलफूलमा आधारित मदिरा बनाउने प्रतिष्ठानको लाइसेन्स र नवीकरण शुल्क चार हजार रूपैयाँले बढाएर एक लाख रूपैयाँ पुर्‍याइएको छ ।

चुरोट उत्पादन गर्ने प्रतिष्ठानलाई दुई लाख ४० हजार रूपैयाँ इजाजत तथा नवीकरण दस्तुर लाग्दै आएकामा त्यस्तो शुल्क तीन लाख रूपैयाँ पुगेको छ । मदिरा बिक्रीवितरणका लागि होटल, रेस्टुराँ, रिसोर्ट, बारले लिने इजाजत तथा नवीकरण दस्तुर पनि बढेको छ । यस्तो शुल्क यसअघि पाँच तारे होटेललाई ६० हजार रूपैयाँ रहेकामा ७५ हजार रूपैयाँ, चारतारे होटललाई ४८ हजार रहेकोमा ६० हजार रूपैयाँ र तीन तारे होटललाई ३६ हजार रूपैयाँ रहेकामा ४५ हजार रूपैयाँ बनाइएको छ ।

दुई तारेलाई २४ हजार रूपैयाँ रहेकामा ३० हजार रूपैयाँ र एक तारेलाई १२ हजार रूपैयाँ रहेकामा १५ हजार रूपैयाँ पुर्‍याइएको छ । स्वदेशी तथा विदेशी मदिरा बेच्ने पर्यटकस्तरको रेस्टुरेन्ट, रिसोर्ट तथा पार्टी प्यालेसले इजाजत तथा नवीकरणका लागि आठ हजार पाँच सय रूपैयाँ तिर्दै आएका थिए । अहिले त्यो बढेर ११ हजार रूपैयाँ पुगेको छ । साधारण होटल, रेस्टुरेन्ट, बार तथा लजका लागि चार हजार पाँच सय रूपैयाँ बराबर शुल्क रहेकामा छ हजार रूपैयाँ पुर्‍याइएको छ ।

मदिरा वितरकलाई यस्तो शूल्क ३६ हजार रूपैयाँ बराबर रहेकामा बढेर ४५ हजार रूपैयाँ पुगेको छ । त्यस्तै मदिराको थोक बिक्रेतालाई २४ हजार रूपैयाँ दस्तुर लाग्ने गरेकामा ३० हजार रूपैयाँ पुर्‍याइएको छ । मदिरा बिक्री गर्ने खुद्रा बिक्रेताको इजाजत लिन तथा त्यस्तो इजाजत नवीकरण गर्दा लाग्ने शुल्क पनि बढेको छ । यस्तो इजाजत तथा नवीकरणका लागि १२ हजार रूपैयाँ शुल्क लाग्ने गरेकामा अब १५ हजार रूपैयाँ शुल्क लाग्नेछ ।

त्यस्तै डिपार्टमेन्टल स्टोरले २४ हजार रूपैयाँ शुल्क तिर्दै आएकामा ३० हजार रूपैयाँ तिर्नुपर्नेछ । विदेशी मदिरा तथा स्प्रिट आयातकर्ताको अनुमति लिन तथा त्यस्तो अनुमतिपत्रको नवीकरणका लागि ४८ हजार रूपैयाँ शुल्क लाग्दै आएकोमा ६० हजार रूपैयाँ पुगेको छ । विदेशी चुरोट तथा सिगार, सूर्तीजन्य पदार्थ आयातकर्तालाई ४८ हजार रूपैयाँ बराबर शुल्क लाग्दै आएको थियो । त्यसलाई बढाएर ६० हजार रूपैयाँ तोकिएको छ ।

त्यस्तै पान मसला, चुरोट, खैनी, जर्दा, नश, तथा सुर्तीजन्य वस्तुका थोक बिक्रेताको लाइसेन्स तथा नवीकरणका लागि सात हजार दुई सय रूपैयाँ लाग्दै आएकामा अब १२ हजार रूपैयाँ शूल्क लाग्नेछ । यस्ता वस्तुको खुद्रा बिक्रेताका लागि दुई हजार रूपैयाँ शुल्क लाग्दै आएकामा अब तीन हजार रूपैयाँ लाग्नेछ । पान मसला, खैनी, जर्दा, नश, चुरोट बाहेकका सूर्तीजन्य वस्तु उत्पादन गर्ने प्रतिष्ठानका लागि एक लाख २० हजार रूपैयाँ लाग्दै आएकामा अब दुई लाख रूपैयाँ लाग्नेछ ।