सेनामा बेथिति–३: बेलायतमा देशको नाम राख्ने प्रमुख सेनानी गुरुङलाई अधिकार माग्दा बदेँलको बात
११ भदौ २०७८ १४:५८
नेपाली सेनामा प्रधानसेनापति पूर्णचन्द्र थापाको कार्यकाल बाहिरबाट हेर्दा जती आर्कषक देखियो, भित्र त्यती नै जर्जर रहेका प्रमाण यतिबेला बाहिर आउन थालेका छन् । उनले आफ्नो कार्यकालको सुरुवात देखि अन्तसम्म भ्रष्टाचार, सुशासन, अनुशासन र शुद्धिकरण तथा विकासको अदभूत ‘मोडल’ स्थापित गरेको दाबीगर्दै हाल घरबिदामा छन् ।
प्रधानसेनापति थापा र उनको कोटरीमा रहेको समूहले कसरी एकजना अब्बल प्रमुख सेनानीलाई घरजान बाध्य बनायो ? सेनामा बेथिती–३ मा हामी त्यस बिषयमा खोत्लदै छौं ।
नेपाली सेनाका प्रमुख सेनानी (लेफ्टीनेन्ट कर्णेल) अशिमदेव गुरुङ यतिबेला राजीनामा दिएर घरमा बसिरहेका छन् । यी तीनै प्रसे गुरुङ हुन जसले दुई वर्षअघि विश्वका ३४ देशका सेनालाई पछि पार्दै नेपालका लागि नेपाली सेनाको तर्फबाट बेलायतमा स्वर्ण पदक जितेका थिए ।
बेलायतमा स्वर्ण पदक जित्ने कमाण्डर प्रसे गुरुङ सहित उनको १० जनाको टोलीलाई प्रधानसेनापति पूर्णचन्द्र थापाले सम्मान समेत गरेका थिए । प्रसे गुरुङको कमाण्डमा खटिएको टोलीले बेलायतमा २४ असोज २०७६ देखि ३ कार्तिक २०७६ सम्म सञ्चालन भएको एक्ससाइज क्याम्ब्रियन प्याट्रोल २०१९ मा स्वर्ण पदक जितेको थियो ।
प्रमुख सेनानी गुरुङ नेतृत्वको टोलीलाई ८ कार्तिक २०७६ मा प्रधानसेनापति थापाले ‘प्रधानसेनापती प्रशंसा निशान’ समेत प्रदान गरेका थिए ।
‘प्रधानसेनापति प्रशंसा निशान’ सुशोभन कार्यक्रममा प्रधानसेनापति थापाले सम्बोधन गर्दैं नेपाल र नेपाली सेनाको प्रतिनिधित्व गरी हासिल गरेको सफलताले नेपाली सेनाको गौरवमय इतिहासलाई थप जीवन्त राख्न महत्त्वपूर्ण भूमिका खेलेको विचार व्यक्त गरेका थिए ।
बेलायतको वेल्सस्थित ब्रेकनमा सम्पन्न उक्त अभ्यासमा बेलायती फौजका १०६ र नेपाली समेत अन्य ३४ देशका गरी कूल १४० सैन्य टोलीहरुको सहभागिता रहेको थियो । नेपाली सेनाको तर्फबाट प्रसे गुरुङले नेतृत्वमा गरेको अभ्यासमा विशेष फौज बाहिनी, पशुपति प्रसाद गण र गौरीबक्स गुल्मका १० जनाको टोलीले सहभागिता जनाएका थिए ।
विश्वस्तरिय सैन्य अभ्यासमा युद्वकालीन विशेष परिस्थितिहरुको कल्पना गरी शत्रुपक्षको गतिविधि समेटेर शारीरिक सहिष्णुता र पेशागत दक्षताको आधारमा मुल्याङ्कन गरिएको थियो । सन् १९६० बाट वार्षिक रुपमा मित्रराष्ट्र बेलायतमा संचालन हुँदै आएको अन्तर्राष्ट्रिय स्तरको ‘एक्ससाइज क्याम्ब्रियन प्याट्रोल २०१९’ प्रतियोगितामा नेपाली सेनाले सन् २०१४ बाट भाग लिदैं आईरहेको छ ।
अब प्रश्न उठछ, सेनामा माथिल्लो तहसम्म पुग्ने सम्भावना बोकेका प्रसे गुरुङले एकाएक किन राजीनामा दिए?
प्रसे गुरुङ पशुुपति प्रसाद गणका गणपति थिए । उनी बेलायतमा यही गणबाट खटिएका थिए । अब्बल व्यवसायिक चरित्र भएका गुरुङ यो अन्तर्राष्ट्रिय प्रतियोगिता बाहेक सेनाभित्रको आन्तरिक प्रतियोगितामा समेत आफु र गणलाई अब्बल राख्ने अधिकारीमध्ये एक थिए ।
यही सेरोफेरोमा उनले अपरेशनल रेडिनेश इन्स्पेक्सन र पेशागत प्रतियोगितामा समेत अब्बल काम गरेका थिए । सोही अनुसार उनी २०७६/०७७ मा प्रथम पनि भए । उनले प्राप्त गरेको अंकका आधारमा जंगी अड्डाभित्रबाटै उनलाई त्यो सूचना आएको थियो ।
सेनामा अब्बल भएर ब्यानर पाउने गणका गणपतिले एउटा निश्चित नफ्रीको कमाण्डगर्दै संयुक्त राष्ट्र संघको शान्ति मिशनमा सहभागी हुन पाउने नियम छ । सोही अनुसार पशुपति प्रसाद गणको नेतृत्वगर्दै प्रसे गुरुङपनि कुनै एउटा मिशनको कमाण्डमा जानुपर्ने थियो ।
तर, त्यसो हुन सकेन ।
जंगी अड्डाले नतिजा निकाल्दा उनलाई दोस्रो बनायो । प्रथम बन्यो प्रधानसेनापति थापाको गण श्रीजंग गण । र प्रथम तथा उत्कृष्ट बने गणपति प्रसे शिखर जबरा ।
यो बिषय प्रसे गुरुङले मौखिक रुपमा प्रधानसेनापति थापा सहित जंगी अड्डामा भने । एकप्रकारले मौखिक उजुरी उनले दिए । तर, त्यसको कुनै सुनवाई भएन ।
सैनिक उच्च स्रोतका अनुसार घरजाने बेला प्रधानसेनापति थापाले आफ्नो गण र प्रसे जबरालाई केही गर्दिनु पर्ने थियो । यसका लागि उनको कोटरीमा रहेका जर्नेलहरु प्रेम शाही, अनन्त कार्की र हिरालाल जोशी तथा महासेनानी माधव थापा समेतको दबाब थियो ।
‘मसे माधव थापा समेत सोही गणको भएकाले प्रसे शिखर र उनको गणलाई बलजफ्ती प्रथम बनाइयो,’ जंगी अड्डास्थित उच्च सैनिक स्रोतले पर्दाफासलाई भन्यो, ‘पछि जबराको सवारी दुर्घटना भएपछि पनि महान्यायाधीवक्ता कार्यालय मार्फत चलखेल समेत भएको छ ।’
यो घटनापछि प्रसे गुरुङ पशुपति प्रसाद गणबाट नगरकोटस्थित सेनाको वार कलेजमा सरुवा भयो ।
तर, उनले जंगी अड्डामा उठाएको आवाज प्रधानसेनापति थापा र उनको कोटरीका जर्नेल र कर्णेलहरुलाई चित्त बुझेको थिएन् । अब, प्रसे गुरुङलाई कसरी फसाउने भन्ने योजना बुन्न थालियो ।
सोही योजना अनुसार केही महिनाअघि प्रसे गुरुङलाई ‘जंगली बदेँल मारेर खाएको’ भन्ने आरोप लगाएर छानबिन थालियो । यसअघि पनि विभिन्न आरोप लगाउने प्रयासबाट सचेत रहेका प्रसे गुरुङले भित्री कुरा बुझे । यसरी अन्याय र झुठा आरोप सहेर बस्नुभन्दा उनले राजीनामा दिएको उनकै ब्याचीमध्ये एकले पर्दाफासलाई बताए ।
यतिबेला श्रीजंग गण र प्रसे जबरा साउथ सुडानस्थित शान्ति मिशन जाने तयारी गरिरहेका छन् । यता, प्रसे गुरुङ भने सेनाभित्र आफुलाई परेको अन्याय बिरुद्ध के गर्ने भन्ने सोचमा डुबेका छन् ।
सवारी ज्यानमा जबरालाई मुद्दा नचलाउन प्रधानसेनापतिकै दौडधुप
प्रसे शिखर जबराले चलाएको कारले ठक्कर दिँदा २६ बैशाख २०७७ मा रविभवनमा टिकाराज गेलालको मृत्यु भएको थियो । सो घटनामा प्रसे जबराको गल्ती नदेखिएपनि प्रहरीले मुद्दा अदालतमा दर्ताको प्रक्रिया अघि बढाएको थियो ।
तर, प्रधानसेनापति थापाले प्रसे जबरा बिरुद्ध फौजदारी मुद्दा चलेमा मिशनमा जान नमिल्ने भएपछि तत्कालिन महान्यायाधीवक्ता अग्निप्रसाद खरेललाई दबाब दिएर मुद्दा नचल्ने बनाए ।
जबराले चलाएको कारले बिपरित दिशाबाट तर सोही लेनमा आउँदै गरेको शिकारु गेलालले चलाएको मोटरसाइकललाई ठक्कर दिएको थियो । पर्दाफासलाई प्राप्त अभियोगपत्र र क्लोजसर्किट क्यामरामा कैद दृश्यले जबराले चाहेको भए दुर्घटनामा क्षती कम हुनसक्ने देखिन्छ । उनले केही दुरीमा रहेको मोटरसाईकल देखेपछि झनै स्पिड बढाएका थिए ।
प्रहरीमा उनले आफू आत्तिएको बताएका छन् । तर, यो घटनामा कानूनी उपचार नै अवरुद्ध गरेर जबरालाई बचाएकोमा प्रहरी समेत असन्तुष्ट बनेको थियो ।
यो पनि पढ्नुहोस्ः
सेनामा बेथिति–६: ‘सेटिङ–शासन’ बिरुद्ध प्रधानमन्त्री, रक्षामन्त्री र सेनापतिलाई उजुरी
सेनामा बेथिति–५: यस्तो छ कल्याणकारीदेखि प्रधानसेनापति कोष रकम हिनामिनाको फेहरिस्त
सेनामा बेथिति–४:सेनापति निकटलाई भ्रष्टाचारमा ‘छुट’, कोअईकै काम किर्ते
सेनामा बेथिति–३ः बेलायतमा देशको नाम राख्ने प्रमुख सेनानी गुरुङलाई अधिकार माग्दा बदेँलको बात
सेनामा बेथिति–२: प्रधानसेनापति राणाले थुन्न आदेश दिएका उपरथी शाही, उमेर सच्याएर रथी बन्ने दाउमा
सेनामा बेथिती– १ : उपरथीकी छोरी–बुहारीलाई लागेन सैनिक नियम
प्रतिक्रिया