तनहुँमा घरमा ठोक्कियो ट्रक, ८ जना घाइते, राजमार्ग अवरुद्ध
२० वैशाख २०८० १२:५३
तनहुँमा ट्रक घरमा ठोक्किँदा ८ जना घाइते भएका छन्।
बन्दिपुर गाउँपालिका-५, आँधीखोलास्थित पृथ्वीराजमार्गको आँबुखैरेनी-डुम्रे सडकखण्डमा रहेका दुईवटा घरमा ट्रक ठोक्किँदा ८ जना घाइते भएका जिल्ला प्रहरी कार्यालयका प्रहरी नायब उपरीक्ष (डीएसपी) मोहनबहादुर खाणले जानकारी दिए।
बुधबार बिहान डुम्रेबाट मुग्लिनतर्फ जाँदै गरेको ना ४ ख १९७३ नम्बरको ट्रक अनियन्त्रित भई सडकको छेउमा रहेको सुनमाया भुजेल र सनबहादुर भुजेलको घरमा ठोक्किएको हो।
दुर्घटनामा घाइते भएकामध्ये अधिकांश बालबालिका छन्। घाइतेहरू ट्रकले ठक्कर दिएका र सोही आसपासका घरमा बस्नेहरू हुन्।
दुर्घटनामा १२ वर्षीय आयुष भुजेल, ६ वर्षीया आयुषा भुजेल, ५० वर्षीय चेतबहादुर घर्ती, ५५ वर्षीय सनबहादुर भुजेल छन्।
यस्तै १० वर्षीया जस्मिन भुजेल, १० वर्षीय ईश्वर भुजेल, ८ वर्षीय समीर भुजेल र ५ वर्षीय सन्तोष भुजेल पनि घाइते भएका छन्।
घाइतेहरूलाई हार्डजोर्नी अस्पताल आँबुखैरेनीमा प्राथमिक उपचारपछि थप उपचारका लागि चितवन भरतपुरस्थित पुरानो मेडिकल कलेज पठाइएको छ।
दुर्घटनापछि अहिले राजमार्ग अवरुद्ध रहेको र खुलाउने प्रयास भइरहेको प्रहरीले जनाएको छ।
सबै तस्बिरहरू : डीपी अधिकारीकाे फेसबुक।
प्रतिक्रिया