ठूलो परिमाणमा नक्कली मह र कच्चा पदार्थसहित बूढानीलकण्ठबाट व्यापारी पक्राउ

प्रहरीले काठमाडौंको बूढानीलकण्ठबाट ठूलो परिमाणमा नक्कली मह र कच्चा पदार्थसहित व्यापारीलाई पक्राउ गरेको छ।

अखाद्य मिसावट गरी मह उत्पादन तथा बिक्री गरेको आरोपमा बूढानीलकण्ठ-२ स्थित गार्डेन अपियरी उद्योग प्रालिका सञ्चालक ५९ वर्षीय पवन सत्याल पक्राउ परेका हुन्।

उनलाई सोमबार मध्याह्न १२ बजे प्रहरी प्रभाग बूढानीलकण्ठ र प्रहरी वृत्त महाराजञ्जबाट खटिएको प्रहरी टोलीले पक्राउ गरेको हो।

प्रहरी र स्थानीय जनप्रतिनिधिसमेतको टोलीले खानतलासी गरेर उनको पसलबाट ठूलो परिमाणमा तयारी मह र कच्चा पदार्थ बरामद गरेको छ।

प्रहरीका अनुसार तयारी मह ७०० बट्टा र कच्चा पदार्थ ४० बाल्टिन बरामद भएको हो। बरामद मह र कच्चा पदार्थको मूल्य ५ लाख रुपैयाँ बराबर पर्ने प्रहरीले जनाएको छ।

बरामद महको नमुना परीक्षणका प्रहरी वृत्त महाराजगञ्ज पठाइएको छ। पक्राउ परेका सञ्चालकलाई प्रहरी प्रभाग बूढानीलकण्ठमा राखेर थप अनुसन्धान भइरहेको प्रहरीले जनाएको छ।