‘ए’ डिभिजन फुटबल : जावलाखेल र संकटा बराबरीमा रोकिए

शहीद स्मारक ‘ए’ डिभिजन लिग फुटबल प्रतियोगिताअन्तर्गत आज भएको जावलाखेल युथ क्लब र संकटा क्लबबीचको खेल बराबरीमा सकिएको छ ।

सातदोबाटोस्थित एन्फा (अखिल नेपाल फुटबल संघ) कम्प्लेक्समा भएको खेलमा लिग लिडर जावलाखेल र संकटा क्लबबीचको खेल १-१ गोलको बराबरीमा टुंगिएको हो । खेलमा पहिलो अग्रता भने जावालाखेलले लिएको थियो ।

खेलको ३३ औं मिनेटमा जावलाखेलका विदेशी खेलाडी फोडे फोफानाले गोल गर्दै सुरुआती अग्रता दिलाएका थिए । जावलाखेलको १-० गोलको अग्रता लामो समयसम्म टिक्न सकेन । खेलको ७३ औं मिनेटमा संकटाका खेलाडी निशान खड्काले गोल गर्दै खेललाई १-१ गोलको बराबरीमा ल्याए ।

यस बराबरी खेलसँगै जावलाखेलले १३ खेलमा २४ अंक जोडेको छ । जावलाखेल अंक तालिकाको शीर्ष स्थानमा छ । त्यस्तै समान १३ खेल नै खेलको संकटा १६ अंक जोडेर अंक तालिकाको ११ औं स्थानमा रहेको छ ।