देशभर निर्माणाधीन होटल, भवन र अपार्टमेन्टहरूको वैधानिकता खोजी गर्न तोसिमाको माग

राष्ट्रिय स्वतन्त्र पार्टीकी सांसद डा. तोसिमा कार्कीले देशभर निर्माणाधीन होटलहरू, भवनहरू र अपार्टमेन्टहरूको तत्काल वैधानिकता खोजी गर्न सरकारसँग माग गरेकी छन्।

बुधबार प्रतिनिधि सभा बैठकमा बोल्दै उनले ललितपुरको बखुण्डोलमा निर्माणाधीन समिट अपार्टमेन्टको वैधानिकता नरहेको उल्लेख गर्दै सरकारले त्यस्ता बन्दै गरेका सबै अपार्टमेन्ट, भवन र होटलहरूको वैधानिकता खोजी गर्नुपर्ने बताएकी हुन्।

सांसद कार्कीले त्यसका लागि छानबिन गर्न संसदीय समिति बनाउन पनि माग गरिन्। उनले समिट अपार्टमेन्ट निर्माणको क्रममा वरपर भासिएका घरहरूको उचित क्षतिपूर्तिको व्यवस्था गर्न र दोषीमाथि कडा कारबाही गर्न पनि सरकारलाई सचेत गराइन्।

सांसद कार्कीले भनिन्, ‘ललितपुरको बखुण्डोल हाइटमा १८ रोपनी जग्गामा १६ तले समिट अपार्टमेन्ट बनाइरहँदा बिना नक्सापास, बिना ईआईए, बिना स्थानीयको स्वीकृति बन्दै गर्दा वरपरको घरहरू पूर्ण रूपमा क्षति भएका छन्। भासिने, चर्कने क्रम जारी छ। स्थानीयहरूले पटकपटक उजुरी दिए पनि काम नरोकिएको गुनासो गरेका छन्। अघिल्लो संसद बैठकमा पनि कुरा उठ्यो। तर, वैधानिक प्रक्रिया अघि बढेको छैन। सभामुख महोदय, म आग्रह गर्न चाहन्छु, यसरी देशभर बनाइरहेका होटलहरू, भवनहरू, अपार्टमेन्टहरूको वैधानिकता खोजी गरियोस्। संसदीय समिति बनाइकन यसको छानबिन प्रक्रिया अघि बढाइयोस्। दोषीलाई कारबाही, पीडितलाई क्षतिपूर्ति र संरक्षण गर्नुपर्ने व्यवस्था आजैबाट सुरु गरियोस्।’

सांसद कार्कीले समिट अपार्टमेन्टको निर्माणकार्य तत्काल रोकी छानबिनको कामलाई तत्काल अघि बढाउन पनि सरकारलाई दबाब दिइन्।