‘रेमिट्यान्सबाट कर्मचारीलाई तलब खुवाउनुपर्ने अवस्थामा पनि प्रधानमन्त्री अर्थतन्त्र राम्रो छ भन्दैछन्’
२५ चैत २०७९ १७:४३
फाइल तस्बिर।
नेकपा (एमाले)का अध्यक्ष एवं पूर्वप्रधानमन्त्री केपी शर्मा ओलीले प्रधानमन्त्री पुष्पकमल दाहालले ‘कमिटमेन्ट’को मात्रै वर्षा गर्ने गरेको टिप्पणी गरेका छन्।
अध्यक्ष ओलीले मुलुक आर्थिक संकटमा धकेलिँदै गइरहेका बेला पनि प्रधानमन्त्री दाहालले भने ढुक्क, आराम, आनन्द र प्रशन्न चित्तमा ‘कमिटमेन्ट’को वर्षा मात्रै गर्ने गरेको बताएका हुन्।
शनिबार काठमाडौंमा आयोजित राष्ट्रिय सहकारी महासम्मेलनमा बोल्दै उनले विज्ञहरूले समेत मुलुकमा रेमिट्यान्सबाट कर्मचारीलाई तलब खुवाउनुपर्ने स्थिति आएको भनिरहेका बेला पनि सरकार र प्रधानमन्त्री दाहालले भने राम्रो छ भनेर बसिरहेको बताए। बैंकले पैसा दिन नसक्ने अवस्था आएका बेला पनि प्रधानमन्त्री दाहालले मुलुकको अर्थतन्त्र राम्रो छ भनेर आश्वासन दिन पछि नपरेको बताए।
उनले मुलुकलाई आर्थिक संकटबाट जोगाउने काम सहकारीले मात्रै गर्न सक्ने भन्दै त्यस क्षेत्रलाई बदनाम हुन नदिन पनि सहकारी अभियन्ताहरूलाई सचेत गराए। अध्यक्ष ओलीले सहकारी क्षेत्रलाई प्रोत्साहित गर्दै अघि बढ्न सरकारलाई सुझाव दिए।
एकाध सहकारी देखाएर विरोध गर्ने भन्दा पनि सहकारीको संरक्षण गर्दै मुलुकलाई आर्थिक संकटबाट जोगाउन सरकारले ध्यान दिनुपर्ने उनको भनाइ छ। ओलीले यतिबेलाको अर्थतन्त्रको स्थितिलाई सुधार्न सहकारीलाई प्रोत्साहित र अझ सुदृढ बनाउनुको विकल्प नरहेको बताए।
ओलीले अनाावश्यक खालको खर्च काटेर सहकारीलाई सबल बनाउनेतर्फ सरकार लाग्नुपर्ने पनि बताए। अध्यक्ष ओलीले आर्थिक संकटको बेला सहकारीको विरोध गर्न नहुने बताए।
सम्बन्धित समाचार
प्रतिक्रिया