निर्वाचन प्रणाली सुधारको प्रक्रियामा छौं : आयुक्त डा. तुलाधार

निर्वाचन आयुक्त डा. जानकीकुमारी तुलाधरले निर्वाचन आयोग निर्वाचन प्रणालीको सम्पूर्ण सुधारको प्रक्रियामा रहेको बताएकी छन्।

मंगलबार ललितपुरमा आयोजित एक कार्यक्रममा बोल्दै उनले आयोगले निर्वाचन प्रणालीको सुधार गर्नका लागि काम गरिरहेको बताएकी हुन्।

उनले निर्वाचनका लागि अझै परिष्कृत तरिकाले अघि बढ्न आयोगले आफ्ना कामहरू गरिरहेको स्पष्ट पारिन्। उनले निर्वाचन प्रणालीको सुधारका लागि सशक्त कानून बनाउन आवश्यक रहेको बताइन्।

उनले साइबर अपराधको नियमन र नियन्त्रण गर्न र डिजिटल माध्यमबाट हुनसक्ने सम्भावित हस्तक्षेप रोक्न कानून र प्रविधिको अभाव रहेको बताइन्। उनले अनुगमन संयन्त्र पर्याप्त नहुँदा पनि धेरै समस्या भोग्नु परेको उल्लेख गरिन्।

उनले द्वेषपूर्ण अभिव्यक्ति निर्वाचनको समयमा मात्रै नभई अन्य समयमा पनि भइरहने भएकाले त्यसको नियमन हुन आवश्यक रहेको बताइन्। उनले सामाजिक सञ्जालको सही सदुपयोग गरी जनस्तरमा प्रचारप्रसार गर्न आवश्यक रहेको बताइन्।