प्रदेशको नामकरण हुन नसक्दा लज्जाबोध भइरहेको छ : मुख्यमन्त्री कार्की
२८ माघ २०७९ १७:२९
मुख्यमन्त्री हिक्मतकुमार कार्की। फाइल तस्बिर
प्रदेश १ का मुख्यमन्त्री हिक्मत कार्कीले प्रदेश सरकारलाई मितव्ययी र विकासमुखी बनाउन आफू लागिपरेको बताएका छन्।
नेपाल रेडक्रस सोसाइटी झापा शाखाको ४९औं जिल्ला सभा अधिवेशनमा मुख्यमन्त्री कार्कीले प्रदेश संरचनाप्रति आलोचना भइरहेकाले प्रदेश सरकारलाई जनतामुखी बनाउन आफू लागिपरेको बताएका हुन्।
उनले भने, ‘मैले कार्यभार सम्हालेपछि पहिलो बैठकमै नौवटाभन्दा बढी मन्त्रालय नबनाउने निर्णय गरेको छु।’ प्रदेश सरकार सञ्चालनका लागि सातभन्दा बढी मन्त्रालय आवश्यक नभएको मुख्यमन्त्री कार्कीको भनाइ छ।
प्रदेश सरकारप्रति सकारात्मक आलोचनाको समेत गर्न मुख्यमन्त्री कार्कीले आग्रह गरे। प्रदेश सरकारको संचरना बनाउने कामसमेत बाँकी रहेकाले संरचना बनाउने काम अघि बढाइएको उनले बताए। मुख्यमन्त्री कार्कीले छिट्टै प्रदेशको नामकरण गरिने बताए।
‘पाँच वर्षसम्म प्रदेशको न्वारन हुन सकेन,’ उनले भने, ‘प्रदेशको नामकरण हुन नसक्दा मलाई लज्जाबोध भइरहेको छ।’ प्रदेशको नामकरणका लागि सबैको सुझाव, सल्लाह आवश्यक रहेकोसमेत उनले बताए।
कार्यक्रममा रेवतीरमण नेपाल स्वयंसेवा सम्मानबाट तीन जनालाई सम्मानित गरिएको छ । सम्मानित हुनेमा नारायण ढुंगाना, दिव्यप्रसाद भुर्तेल र तुलसी काफ्ले रहेका छन्। ्
नगद ११ हजार, सम्मानपत्र र दोसल्ला ओढाएर मुख्यमन्त्री कार्की, पुरस्कारका संरक्षक वेदकुमारी नेपाल र रेडक्रस झापाका सपभाति लोकराज ढकालले उनीहरूलाई सम्मानित गरेका थिए। यस्तै जिल्लामा धेरै रक्तदान गर्ने विरता लेडी जेसिज, तेरापन्थ युवा परिसद् र विराट अर्जुन उपभोक्ता सहकारीलाई प्रशंसापत्र प्रदान गरिएको छ।
प्रतिक्रिया