लुम्बिनीको मुख्यमन्त्रीमा एमालेका लीला गिरीको दाबी पेस

लुम्बिनीको मुख्यमन्त्रीमा नेकपा (एमाले) संसदीय दलका नेता लीला गिरीले दाबी पेस गरेका छन्।

लुम्बिनी प्रदेशमा सरकारको नेतृत्वका लागि सत्ताारूढ गठबन्धन दलको समर्थनमा नेता गिरीले दाबी पेस गरेका हुन्। प्रदेश प्रमुख अमिक शेरचनको कार्यालय पुगेर बहुमत प्रदेश सभा सदस्यको हस्ताक्षरसहित सरकारमा दाबी प्रस्तुत गरिएको एमाले प्रदेश सभा सदस्य भूमिश्वर ढकालले जानकारी दिए।

गिरीलाई एमालेका २९, नेकपा (माओवादी केन्द्र)का १०, राप्रपाका चार, नागरिक उन्मुक्ति पार्टीका चार, जनता समावादी पार्टीका तीन, स्वतन्त्र दुई, जनमत पार्टीका तीन र लोकतान्त्रिक समाजवादी पार्टीका तीन गरी ५८ प्रदेश सभा सदस्यको समर्थन रहेको उनले बताए।

प्रदेश प्रमुख अमिक शेरचनले आज अपराह्न ४ बजेभित्र सरकारको नेतृत्वमा दाबी पेस गर्न आह्वान गरेपछि एमालेले सत्तारूढ दलहरूको समर्थनमा सरकारको नेतृत्वमा दाबी प्रस्तुत गरेको हो। दाबी पेस भएपछि प्रदेश प्रमुख शेरचनले आजै गिरीलाई मुख्यमन्त्रीमा नियुक्त गर्नेछन्।

यसअघि मंगलबार अपराह्न ४ बजे प्रदेश प्रमुख कार्यालय बुटवलमा सत्ता गठबन्धन दलले दाबी पेस गर्ने तयारी गरे पनि माओवादी केन्द्रले आलोपालो नेतृत्व गर्नुपर्ने अडान राखेपछि अन्तिम समयमा दाबी प्रक्रिया स्थगित गरिएको थियो।