मनोहरा नदीको आसपासका क्षेत्रमा ८४ प्रजातिका चरा भेटिए

मनोहरा नदीको तटीय भाग र आसपासका क्षेत्रमा ८४ प्रजातिका चरा भेटिएका छन्। वन्यजन्तु फोटोग्राफर तथा पक्षीप्रेमी सञ्जय था श्रेष्ठ नेतृत्वको टोलीले मंगलबार गरेको चरा गणनामा उक्त क्षेत्रमा आगन्तुक र स्थानीय गरी ८४ प्रजातिका चरा भेटिएका हुन्। मिड विन्टर वाटरवर्ड काउन्ट २०२३ अन्तर्गत गरिएको चरा गणनामा विगत वर्षको तुलनामा कम सङ्ख्यामा चरा भेटिएको फोटोग्राफर श्रेष्ठले बताए। बढ्दो शहरीकरण र नदी तटीय क्षेत्रमा मानवीय अतिक्रमण, शहरीकरणलगायत कारणले पछिल्लो समय चराहरूको संख्यामा उल्लेख्य कमी आइरहेको उनको भनाइ थियो।

फोटोग्राफर श्रेष्ठका अनुसार खोला आसपास क्षेत्रमा बढ्दो निर्माण, डोजर र ड्रिल आदिको प्रयोगले चराचुरुंगीको बासस्थान विनाश हुँदै गइरहेको छ। जल पक्षीहरूको संख्यामा कमी आउनाको अर्को कारक खोलाको पानी प्रदूषित बन्नु पनि रहेको छ।

खोलामा जथाभावी फोहर फ्याँक्ने, ढल मिसाउने, विभिन्न उद्योग कलकारखाना आदिबाट फिल्टर नगरी वा प्रशोधन नगरी नदीमा सिधै पानी विसर्जन गर्ने गरिएकाले पनि पानीमा निर्भर रहने माछा, भ्यागुतो र कीराहरूको अभाव हुन गई त्यसमा निर्भर रहने चराहरूको संख्यामा समेत कमी हुन गएको चरा गणनामा संलग्न अर्का फोटोग्राफर चन्द्र चक्रधरले बताए। ‘नदी प्रदूषणले गर्दा प्राकृतिक प्रणालीमा असर परेको देखिन्छ जसका कारण खाद्य चक्रमा समेत असर परी चराहरुको संख्यामा कमी आएको छ,’ उनले भने।

मनोहरा क्षेत्रमा अर्को ठूलो समस्याका रूपमा रहेको बालुवा चोरी निकासीले गर्दा चराहरूको संख्यामा कमी आएको टोलीको निष्कर्ष छ। बालुवा तस्करीका कारण खोला आसपासमा मानवीय गतिविधि बढ्दै गएको, चराहरूको प्रजनन गर्ने सुरक्षित स्थान अभाव हुँदै गएको अर्का टोली सदस्य तथा चराप्रेमी सुरेश खम्बु श्रेष्ठले बताए।

मनोहरा नदी र मध्यपुर थिमि–८ र ९ मा रहेको मनोहरा मिनी कोशीटप्पुमा साइप्रस र युरोपका विभिन्न देशहरुबाट जाडो छल्नका लागि विभिन्न प्रजातिका आगन्तुक चराहरू आउने गर्दछन्। मनोहरा नदी आसपास चरा गणनामा श्रेष्ठको नेतृत्वमा फोटोग्राफरहरू चन्द्र चक्रधर, विनय श्रेष्ठ, बर्ड वाचर राम श्रेष्ठ, विद्यार्थी आयुशा पौडेल, चराप्रेमीहरू सुरेश खम्बु, विक्की अदुवा र शैलेन्द्र भासिक सहभागी थिए।