![Pardafas.com](https://www.pardafas.com/wp-content/uploads/2022/06/pardafas-logo.png)
अबदेखि रात्रि बस नयाँ बसपार्कमा मात्र पार्किङ गर्न पाइने
![clock](https://www.pardafas.com/wp-content/themes/pardafas/assets/img/clock-icon.png)
![अबदेखि रात्रि बस नयाँ बसपार्कमा मात्र पार्किङ गर्न पाइने](https://www.pardafas.com/wp-content/uploads/2022/12/Bus-New-Buspark.jpg)
काठमाडौंको गोङ्गबुस्थित नयाँ बसपार्कमा मात्र रात्रिबस पार्किङ गर्न पाइने भएको छ। ट्राफिक प्रहरीले सरोकारवाला निकायसँग छलफल गरि मुलुकको सङ्घीय राजधानी काठमाडौंबाट देशका विभिन्न जिल्लाका लागि छुट्ने रात्रिबस गोङ्गबुस्थित नयाँ बसपार्कबाट मात्र पार्किङ गर्न पाइने व्यवस्था गरेको हो।
काठमाडौं उपत्यका ट्राफिक प्रहरी कार्यालयका प्रवक्ता, प्रहरी वरिष्ठ उपरीक्षक राजेन्द्रप्रसाद भट्टले रात्रिबस जथाभावी पार्किङ गर्नाले सवारी दुर्घटनाको जोखिम हुनुका साथै ट्राफिक जामसमेत हुने भएकाले अबदेखि नयाँ बसपार्कबाट मात्र पार्किङ गर्नुपर्ने व्यवस्था गरिएको बताए।
‘ललितपुरको ग्वार्कोमा बन्न लागेको फ्लाई ओभर निर्माणसँगै रात्रिबस चक्रपथ वरपर सञ्चालन हुँदा सवारी साधनको जाम बढेकाले नयाँ बसपार्कबाट मात्र संचालन गर्नुपर्ने व्यवस्था मिलाएका हौं,’ प्रवक्ता भट्टले भने।
यसअघि रात्रिबस उपत्यकाको चाबहिल, गौशाला, कोटेश्वर, कलंकी, गोङ्गबु, माछापोखरीलगायतका क्षेत्रमा पार्किङ गरिँदै थियो।
नेपाल यातायात व्यवसायी राष्ट्रिय महासङ्घका अध्यक्ष विजयबहादुर स्वाँरले नागरिकलाई सहज ढङ्गले सेवा संचालन गर्ने गरि यातायात क्षेत्रलाई अगाडि बढाउनुपर्ने बताए।
‘रात्रिबसलाई नयाँ बसपार्कबाट संचालन गर्नेबारे यातायात व्यवसायीलाई कुनै आपत्ती छैन। रातको समयमा व्यवस्थितरुपमा चढाउने र झार्ने गर्नसके यात्रुलाई समेत सहज हुन्छ’, उनले भने।
अध्यक्ष स्वाँरले कार्यालयको समयबाहेकका अन्य समयमा चक्रपथ वरपर सहज ढङ्गले चढाउने र झार्ने गरेर बसपार्कभित्र आएर बस्ने वातावरण निर्माण गर्नुपर्ने बताए। उनले ट्राफिक जरिवना रकम पाँच सयबाट बढाएर एक हजार पाँच सय बनाएको भन्दै आपत्ति पनि जनाएका छन्। यातायात क्षेत्रलाई व्यवस्थितरुपमा संचालन गर्नका लागि अधिकार सम्पन्न यातायात प्राधिकरण गठन गर्नुपर्ने उनको भनाइ थियो।
वि सं २०५६ मा काठमाडौं महानगरपालिका र ल्होत्से बहुउद्देश्यीय प्रालिबिच ‘सार्वजनिक–निजी साझेदारी’अन्तर्गत सम्झौता गरेर काठमाडौं महानगरपालिका-२६ गोङ्गबुमा १६१ रोपनी क्षेत्रफलमा संचालनमा ल्याइएको नयाँ बसपार्कमा दुई हजारभन्दा बढी सवारी साधन अटाउँछन्। उक्त बसपार्कबाट हाल देशभर ६० भन्दा बढी जिल्लामा सवारी साधन आवतजावत हुँदै आएका छन्।
प्रतिक्रिया