सर्बियामा बीआरआई परियोजनामा निर्माण भएकाे पुल ढलेपछि प्रदर्शन, भ्रष्टाचारको आरोप
चिनियाँ ठेकेदारहरूसँगको कारोबारमाथि शंका
४ पुष २०८१ १६:३८
तस्विर साैजन्य: राेयटर्स
बेल्ट एण्ड रोड इनिसिएटिभ (बीआरआई) अन्तर्गत सर्बियाको नोभि साडमा निर्माण गरिएको रेलवे स्टेशनसँग जोडिएको पुल ढलेपछि स्थानीय नागरिक र विद्यार्थीहरूले जवाफदेहिताको माग गर्दै प्रदर्शन जारी राखेका छन्।
नोभेम्बर १ मा भएको यो दुर्घटनामा १५ जनाको ज्यान गएको थियो। घटनापछि ६ हप्ताभन्दा बढी समयदेखि प्रदर्शनकारीहरूले सर्बियाली राष्ट्रपति अलेक्जान्डर भुकिकको प्रशासनविरुद्ध सडकमा उत्रिएर भ्रष्टाचार र लापरवाहीको आरोप लगाएका छन्।
प्रदर्शनकारीहरूले बेइजिङका चिनियाँ ठेकेदारहरूसँगको कारोबारमा व्यापक भ्रष्टाचार भएको दाबी गरेका छन्। उनीहरूको भनाइमा, परियोजनाको गुणस्तरमा लापरवाही र ठेकेदारहरूलाई अनियमित ढंगले ठेक्का दिइएको कारण दुर्घटना भएको हो।
प्रदर्शनकारीहरूले दोषीलाई कारबाही र पीडितका परिवारलाई न्यायको सुनिश्चितताको माग गरेका छन्। उनीहरूले पुल निर्माणमा संलग्न सबै पक्षमाथि स्वतन्त्र अनुसन्धान हुनुपर्ने भन्दै सरकारको चर्को आलोचना गरेका छन्।
यो घटना बीआरआई परियोजनाहरूको पारदर्शिता र विश्वसनीयतामाथि पुनः प्रश्न खडा गर्दै, स्थानीयस्तरमा तीव्र असन्तोष फैलाएको छ।
सम्बन्धित समाचार
प्रतिक्रिया