प्रधानसेनापतिद्वारा अमेरिकाका उच्चपदस्थ पदाधिकारीसँग भेटवार्ता

अमेरिका भ्रमणमा रहेका प्रधानसेनापति प्रभुराम शर्माले बिहीबार उच्च पदाधिकारीहरुसँग भेटवार्ता गरेका छन् ।

प्रधानसेनापति शर्माले अमेरिकाको संयुक्त चिफ अफ स्टाफ एडमिरल क्रिस्टोफर डब्ल्यू ग्रेडीका उपाध्यक्ष तथा दक्षिण र दक्षिणपूर्व एशियाका लागि रक्षा सहायक सचिव लिन्डसे डब्ल्यू फोर्डसँग भेटवार्ता गरेका हुन् ।

यस्तै, चिफ अफ स्टाफ अफ द आर्मी (सीएसए) का जनरल जेम्स चाल्र्ससँग पनि भेटवार्ता गरेका छन् । नेपाली सेनाका अनुसार उक्त भेटघाटका क्रममा, नेपाल र मित्रराष्ट्र संयुक्त राज्य अमेरिकाबीचको सैनिक सम्बन्ध तथा दुई राष्ट्रबीच रही आएको पारस्परिक सम्बन्ध एवं हितका विषयहरुमा छलफल तथा विचार विमर्श भएको थियो ।

शुक्रबार प्रधानसेनापति शर्मा र भ्रमणदलका सदस्यहरुले न्युयोर्कस्थित संयुक्त राष्ट्रसंघको मुख्यालय र विभिन्न विभागका उच्च पदस्थ पदाधिकारीहरुसँग भेटघाट र छलफल गर्ने कार्यक्रम रहेको सेनाले जनाएको छ ।