अर्थमन्त्री पौडेलको आह्वान- नेपाल लगानीका दृष्टिकोणले सुरक्षित छ, लगानी बढाउनुस्

उपप्रधानमन्त्री एवं अर्थमन्त्री विष्णुप्रसाद पौडेलले नेपाललाई लगानीको दृष्टिले सुरक्षित गन्तव्यका रुपमा स्थापित गर्ने पहलमा सरकारले महत्वपूर्ण उपलब्धि हासिल गरेको बताएका छन् । शुक्रबार आयोजित पत्रकार सम्मेलनमा बोल्दै उनले सार्वभौम क्रेडिट रेटिङको नतिजाले नेपाल विश्वभरका लगानीकर्ताहरुका लागि आकर्षक गन्तव्यको रुपमा प्रमाणित भएको दाबी गरे ।

उनले नेपालले पहिलो पटक क्रेडिट रेटिङलाई ऐतिहासिक उपलब्धिका रुपमा व्याख्या गर्दै यसको नतिजाले देशको अर्थतन्त्रलाई सुदृढ र विश्वसनीय बनाउने दिशामा ठूलो कदम भएको बताए । उनले भने, ‘यो क्रेडिट रेटिङ हाम्रो पहिलो प्रयास हो । हामी यसलाई निरन्तरता दिंदै नेपालको अर्थतन्त्रको स्वास्थ्य स्थिति आवधिक रुपमा सार्वजनिक गर्दै जानेछौं ।’

अर्थमन्त्री पौडेलले संसारभरका निजी क्षेत्रलाई नेपालमा लगानी गर्न आह्वान गर्दै यहाँ लगानी गर्नेहरुले राम्रो प्रतिफल आर्जन गर्ने विश्वास दिलाए । नेपाललाई अझ आकर्षक बनाउँदै लगानीमैत्री वातावरण निर्माण गर्न कानूनी र संरचनागत सुधारका लागि सरकार प्रतिबद्ध रहेको उनले स्पष्ट पारे । क्रेडिट रेटिङ मात्र अन्तिम लक्ष्य नभई देशको प्रत्यक्ष वैदेशिक लगानी (एफडीआई) भित्र्याउने उद्देश्य रहेको उल्लेख गर्दै उनले आगामी दिनमा अझ बलियो र प्रभावकारी नतिजा ल्याउने प्रतिबद्धता व्यक्त गरे ।

डबल बी माइनसको रेटिङ दक्षिण एशियाका अन्य मुलुकहरुसँग तुलना गर्दा अनुकूल रहेको अर्थमन्त्री पौडेलले जानकारी दिए । उनले नेपालको लगानी सुरक्षाको सन्देश विश्वभर पुर्‍याउँदै लगानीका लागि अझ उपयुक्त परिस्थितिको निर्माण गर्ने लक्ष्य लिएको बताए ।

अर्थतन्त्रलाई सबल, सुदृढ र शक्तिशाली बनाउने लक्ष्यसहित सरकारले निम्नलिखित योजना अघि सारेको छः

क्रेडिट रेटिङको निरन्तरता: आवधिक रुपमा अर्थतन्त्रको अवस्था सार्वजनिक गर्दै सुधारका उपाय लागू गर्ने ।
कानूनी सुधार: वैदेशिक लगानी अनुकूल बनाउने कानून र संरचना निर्माण ।
विश्वव्यापी सन्देश: नेपाल लगानी सुरक्षित मुलुक भएको सन्देश अन्तर्राष्ट्रिय समुदायमा पुर्‍याउने ।
अर्थमन्त्री पौडेलले सबै नागरिक, निजी क्षेत्र, र सरकारको साझा प्रयासबाट नेपालको अर्थतन्त्रलाई अझ सबल बनाउने लक्ष्यमा दृढ रहन आग्रह गरे । यो प्रयासले नेपालको आर्थिक भविष्यप्रति विश्वव्यापी लगानीकर्ताहरुलाई आशावादी बनाउने विश्वास गरिएको छ ।