खोला किनारको मापदण्ड खारेजको माग गर्दै प्रदर्शन

सडक र खोला मापदण्ड खारेजको माग गर्दै काठमाडौंमा प्रदर्शन भएको छ । भूमि अधिकार संरक्षण संघर्ष समिति र गैरन्यायिक सडक तथा खोला मापदण्ड पीडित संघर्ष समितिले जनतालाई उठिवास गर्ने मापदण्ड आवश्यक नरहेको भन्दै आज (बिहीबार) माइतीघर मण्डलमा प्रदर्शन गरेको हो ।

मापदण्ड खारेजको माग गर्दै र्‍यालीसहित खबरदारी कार्यक्रम गरिएको उनीहरूले बताएका छन् । सुमन सायमीलगायतको अगुवाइमा बागमती नदी किनारबाट र्‍याली शुरू भई माइतीघर मण्डल पुगेको हो । ३ पुस २०८० मा सर्वोच्च अदालतले नदी क्षेत्र संरक्षणका लागि बागमती, विष्णुमती लगायत उपत्यकाका ठूला नदी तथा खोलाहरुमा ४० मिटर जग्गा छाडेर मात्र संरचना निर्माणको अनुमति दिन आदेश दिएको थियो ।

त्यसअघि २०६५ सालमा मन्त्रिपरिषदले बागमती, विष्णुमती लगायत ठूला नदीहरुमा २० मिटर क्षेत्र छाड्नुपर्ने निर्णय गरेको थियो । पहिले २० मिटर छाड्नुपर्ने भनिएकोमा खोलामा थप २० मिटर छाड्न सर्वोच्चले दिएको आदेश कार्यान्वयनका लागि काठमाडौं महानगरपालिकाले सूचना जारी गरेको थियो । सर्वोच्च अदालतले नदी किनारबाट दायाँ–बायाँ २०–२० मिटर छाडेर मात्रै संरचना बनाउन पाइने आदेश दिएको थियो । त्यसविरूद्ध सरकार सर्वोच्च गएको छ ।