प्रधानमन्त्री ओलीले बोलाए सर्वदलीय बैठक

प्रधानमन्त्री केपी शर्मा ओलीले सर्वदलीय बैठकको आह्वान गरेका छन् ।

ओलीले आइतबार साँझ ७ बजे सिंहदरबारमा बस्ने गरी सर्वदलीय बैठक बोलाएको सचिवालयले जनाएको छ ।

शुक्रवार तीनकुनेमा दुई जनाको मृत्यु हुने गरी भएको हिंसात्मक आन्दोलन र समसामयिक घटनाबारे छलफल गर्न प्रधानमन्त्रीले आइतबार साँझ सर्वदलीय बैठक बोलाएको सचिवालयका एक सदस्यले जानकारी दिए ।

त्यस्तै, प्रधानमन्त्री ओलीले भोलि १८ गतेको प्रतिनिधिसभा बैठकमा विपक्षीहरूले राखेका मागका विषयमा सम्बोधन गर्ने जानकारी गराएको समेत सभामुख देवराज घिमिरेको सचिवालयले जानकारी दिएको छ ।

सभामुख घिमिरेको सचिवालयका अनुसार संसद् अवरोध खुलाउने विषयमा प्रधानमन्त्री र विपक्षी दलका नेताहरूबिच टेलिफोन संवाद भएको र बृहत् छलफल गरेर संसद् खुलाउने प्रयास भइरहेको सचिवालयले जनाएको छ ।

नेपाल विद्युत् प्राधिकरणको कार्यकारी निर्देशकबाट कुलमान घिसिङलाई हटाउने विषयमा प्रमुख प्रतिपक्षी लगायत विपक्षी दलहरूले प्रधानमन्त्री ओलीसँग स्पष्टीकरणको माग गरेका थिए ।

प्रधानमन्त्री ओलीले सदनलाई जवाफ नदिएसम्म संसद् चल्न नसक्ने उनीहरूको अडान रहेको छ ।