गणतन्त्रवादीलाई १५ गतेको जनप्रदर्शनमा उपस्थित हुन समाजवादी मोर्चाको आह्वान

चारदलीय समाजवादी मोर्चाले १५ गतेको गणतन्त्र रक्षार्थ आन्दोलनमा सहभागिताका लागि आह्वान गरेको छ।

बुधवार नेकपा (एकीकृत समाजवादी) को पार्टी केन्द्रिय कार्यालय आलोकनगरमा बसेको समाजवादी मोर्चाको बैठकले मोर्चाको तर्फबाट १५ गते हुने जनप्रदर्शनमा सहभागी हुन आह्वान गरेको हो ।

बैठकपछि सदस्य-सचिव खड्गबहादुर विश्वकर्माले भने, ‘देशको परिस्थिति सामान्य छैन। जनता पनि सचेत हुने बेला भएको छ। १५ गते गणतन्त्र रक्षार्थ आन्दोलनका लागि सहभागी होऔँ।’

उनले १५ गतेको आन्दोलनमा डेढ लाखभन्दा बढी जनसहभागिता रहने दाबी पनि गरे। ‘देशको परिस्थिति सामान्य छैन। भाइ-भारदारहरू उफ्रिँदैछन्। त्यसका प्रति हामीले जनतालाई आह्वान गर्छौँ,’ उनले भने, ‘डेढ लाख वरिपरि सहभागिता रहन्छ।’

विश्वकर्माले आफूहरूको आन्दोलनलाई बिथोल्नका लागि कहीँ कतैबाट ‘कुचेष्टा’ भइरहेको समेत बताए। १५ गते दुर्गा प्रसाईं नेतृत्वको नागरिक बचाऊ अभियानले पनि काठमाडौंमै प्रदर्शन गर्दैछ। त्यसका प्रति लक्षित हुँदै उनले भने, ‘हामीलाई रोक्ने काम नहोस् कहीँबाट। आफ्नो ठाउँमा गर ठीक छ तर, कहीँ रोक्ने काम वा प्रयास नगरियोस्।’