देशमा केही हुन सक्दैन भन्ने भाष्य अब भाषण गरेर मात्र चिर्न सकिँदैन : श्रममन्त्री भण्डारी

श्रम, रोजगार तथा सामाजिक सुरक्षामन्त्री शरतसिंह भण्डारीले मुलुकमा विकसित युवा पलायनबारे नकारात्मक भाष्यलाई भाषण गरेर मात्र चिर्न नसकिने बताएका छन् ।

मंगलवार काठमाडौं टेक्निकल स्कुलको उद्घाटन समारोहलाई सम्बोधन गर्दै मन्त्री भण्डारीले भाषण गरेर मात्रै मुलुकमा केही हुन सक्दैन भन्ने भाष्य चिर्न नसकिने बताएका हुन् ।

उनले मुलुकमा निर्माण भएको गलत भाष्यलाई चिर्न यसपछाडिको यथार्थलाई सूक्ष्म ढंगले अध्ययन गरेर रणनीति बनाउन जरुरी रहेको बताए । मुलुकमा उत्पन्न असन्तुष्टि र नैराश्यतालाई बदल्ने जिम्मेवारी र दायित्व वर्तमान सरकारले लिएको समेत मन्त्री भण्डारीको दाबी छ । उनले नेपालबाट वैदेशिक रोजगारीमा जानेहरू जस्तै फर्किेनेहरु समेत रहेको बताए । उनले मलेसिया, जापान र कोरिया लगायतका देशमा जानेहरू उतै पलायन हुने अवस्था नरहेको समेत बताए ।

उनले भने ‘हामीसँग अत्यन्त ठूलो जिम्मेवारी र दायित्व छ । त्यो जिम्मेवारी र दायित्वको आधारमा अहिले जुन असन्तुष्टि र नैराश्य निर्माण भएको छ त्यसलाई हामीले बदल्नुपर्दछ । त्यसको लागि नेपालबाट वैदेशिक रोजगारीमा जाने नागरिकको त डाटाहरू आएकै छन् । तर वैदेशिक रोजगारीबाट नेपाल फर्केर कति जना आएका छन् भनेर कसैले पनि कुरा गर्दैन । ७० लाख मान्छे वैदेशिक रोजगारमा गएका छन् । ती मान्छेहरू कहाँ गए ? फर्केर आइरहेका छन् कि छैनन् ? वैदेशिक रोजगारीमा गएका ४२ लाख नेपाली नागरिकहरू फर्किएर नेपालमा आएका छन् भन्ने तथ्यांक मैले प्राप्त गरेको छु । यसले के देखाउँछ भने आउने जाने क्रम त भइरहेको छ । मलेसिया, जापान तथा कोरियामा जाने ९० प्रतिशत नागरिक रहेका छन् । त्यहाँ पलायन हुने अवस्था छैन । निश्चित समयपछि नेपाल फर्केर आउनैपर्छ । त्यसले मुलुकमा गरिबी घटाउनको लागि ३० प्रतिशत मद्दत गर्याे भन्ने कुरा आइरहेको छ ।’

वैदेशिक रोजगारीमा जाने नियमित प्रक्रिया भएपनि सिपयुक्त जनशक्ति पठाउने कुरामा सरकारको ध्यान जानुपर्ने उनको तर्क छ । उनले अबको दश वर्षमा दशलाख सीपयुक्त जनशक्ति उत्पादन गर्ने सरकारको लक्ष्य रहेको समेत बताए । वैदेशिक रोजगारीबाट फर्केकाहरूको सीप र ल्याएको पुँजीलाई मुलुकको विकासमा योगदान गर्न लगाउनु सरकारको प्राथमिकता रहेको बताए ।

उनले भने ‘अब हामीले १० वर्षमा दश लाख जनशक्ति उत्पादन गर्ने मात्र होइन । यो दश वर्षमा वैदेशिक रोजगारीबाट फर्किएका नेपाली नागरिकहरूले सिकेका सीप र पुँजीलाई मुलुकको योगदानमा कसरी लगाउने भन्नेकुरा सबैभन्दा प्राथमिकतामा रहेको छ । सीपयुक्त नागरिक जाँदै गर्छन् । तर फर्किएर आएका मानिसहरूलाई फेरि नफर्किने वातावरण तयार गर्न दश वर्ष हामीले लिन खोजिरहेका छौं ।’

वैदेशिक रोजगारीबाट फर्किएका नागरिकहरूलाई फेरि वैदेशिक रोजगारमा नफर्किने वातावरण तयार गर्न सरकार क्रियाशील रहेको मन्त्री भण्डारीको भनाइ छ ।